Нацбанк прэзентаваў новы графічны знак беларускага рубля
Нацбанк прэзентаваў новы графічны знак беларускага рубля. Відэа галоўная фінансавая ўстанова выклала ў сваім тэлеграм-канале.
Кіраўнік Нацбанка Раман Галоўчанка расказаў, чаму было прынята рашэнне змяніць графічны знак беларускага рубля: «У 2005 годзе быў зацверджаны графічны знак у выглядзе дзвюх лацінскіх літар Br. Але ён не прыжыўся. Таму існуе разнастайнасць у абазначэнні нашай нацыянальнай валюты ў розных цэнніках, у зносінах паміж людзьмі — гэта і Br, і BYN, і бел. руб. Гэта не вельмі правільная сітуацыя, таму з улікам такога няўдалага досведу 2005 года мы вырашылі даць права людзям самім, па-першае, прапанаваць гэты сімвал, а па-другое, прагаласаваць за яго, каб ён лепш прыжыўся, чым папярэдні».
Па словах кіраўніка Нацбанка, новы сімвал адпавядае ўсім крытэрыям: прастата, зручнасць, асацыятыўнасць з Беларуссю.
«Тут ёсць і літара «Б», якая з’яўляецца пачатковай у назве нашай краіны, і гарызантальная рыса, што сімвалізуе ўстойлівасць, стабільнасць. У цэлым гэты знак моцна пераклікаецца з сімваламі грашовых адзінак іншых дзяржаў, але ў той жа час падкрэслівае ўнікальнасць нашага беларускага рубля. Цяпер пытанне ў яго прыжыванні, у шырокім выкарыстанні. Мы разлічваем, што эвалюцыйным шляхам ён зойме сваё месца ў фінансавай сістэме нашай краіны», — распавёў ён.
Раней паведамлялася, што конкурс на найлепшы графічны знак выйграў Васіль Шчабятун, які атрымае прыз — 3000 рублёў.
У конкурсе ўзялі ўдзел каля 2700 работ.