Расія ўдарыла шахедам па радзільні ў Запарожжы
У нядзелю расійскія войскі атакавалі Запарожжа ўдарнымі беспілотнікамі. Адзін з дронаў пацэліў проста ў гінекалагічнае аддзяленне медустановы. Маштабнай трагедыі ўдалося пазбегнуць толькі дзякуючы таму, што пацыенткі і лекары своечасова спусціліся ў сховішча. Тым не менш, без параненых не абышлося, паведамляе Міністэрства аховы здароўя Украіны.
Наступствы расійскага ўдару па радзільні ў Запарожжы. Фота: Запарожская вайсковая адміністрацыя
Паводле звестак МАЗ, у момант удару ў сховішчы медустановы знаходзіўся 31 чалавек: 15 супрацоўнікаў і 16 жанчын, сярод якіх былі тры парадзіхі з немаўлятамі. Гэта выратавала іх ад непазбежнай гібелі, бо асноўны ўдар прыйшоўся акурат па лячэбным корпусе, дзе выбух выклікаў пажар.
Аднак па-за межамі сховішча заставаліся людзі ў суседніх памяшканнях. Параненні атрымалі лекарка, медсястра і пацыент прыватнай стаматалагічнай клінікі, якая месцілася ў гэтым жа комплексе. Усіх траіх у стане сярэдняй цяжкасці шпіталізавалі. Агулам пасля атакі на медустанову вядома пра шасцярых пацярпелых.
Наступствы расійскага ўдару па радзільні ў Запарожжы. Фота: Запарожская вайсковая адміністрацыя
Наступствы расійскага ўдару па радзільні ў Запарожжы. Фота: Запарожская вайсковая адміністрацыя
«Пуцін ваюе насуперак мірным намаганням»
Удар па бальніцы выклікаў вострую рэакцыю ў Кіеве. Міністр замежных спраў Андрэй Сібіга падкрэсліў, што Расія ідзе на эскалацыю тэрору нават тады, калі сусветная супольнасць абмяркоўвае мажлівыя мірныя перамовы.
«Пуцін працягвае ваяваць з цывільнымі грамадзянамі — насуперак мірным намаганням. Толькі сіла можа прымусіць яго спыніць агрэсію і тэрор. У ціску на Маскву і падтрымцы Украіны не павінна быць паўз», — заявіў Сібіга.
Тэрор працягваўся ўвесь дзень
Агульная колькасць пацярпелых у Запарожжы за нядзелю вырасла. Праз некалькі гадзін пасля атакі на радзільню яшчэ адзін расійскі дрон ударыў па горадзе, параніўшы дзвюх жанчын і дзіця.
Наступствы расійскага ўдару па радзільні ў Запарожжы. Фота: Запарожская вайсковая адміністрацыя
Наступствы расійскага ўдару па радзільні ў Запарожжы. Фота: Запарожская вайсковая адміністрацыя
Упаўнаважаны ў правах чалавека Дзмітрый Лубінец адзначыў, што ўдар па гінекалагічным аддзяленні быў свядомым нападам на жанчын і яшчэ ненароджаных дзяцей:
«Для РФ не існуе ніякіх чырвоных ліній. За кожнае такое злачынства павінна наступіць адказнасць».
Наступствы расійскага ўдару па радзільні ў Запарожжы. Фота: Запарожская вайсковая адміністрацыя
Наступствы расійскага ўдару па радзільні ў Запарожжы. Фота: Запарожская вайсковая адміністрацыя
Наступствы для медустановы
У выніку трапляння ў лякарні выбітыя вокны, пашкоджаны фасад і знішчанае медыцынскае абсталяванне. Пажар, які ўспыхнуў на другім паверсе, удалося патушыць.
Пацыенткі, якіх выратавала сховішча, былі неадкладна пераведзеныя ў іншыя аддзяленні і шпіталі горада. Цяпер псіхолагі працуюць з парадзіхамі, якія перажылі наймацнейшы стрэс. Расійскі бок, нягледзячы на відэадоказы разбураных палат, працягвае сцвярджаць, што наносіць удары толькі па вайсковых аб'ектах.