У Беларусі прадалі тур на 10 дзён за дваіх амаль за 23 тысячы даляраў. Што за кірунак?

Турагенцтва «Жара Трэвел» пахвалілася ў Threads, што 26 студзеня ўпершыню ў сваёй гісторыі змагло прадаць тур коштам 22728 даляраў.

Гара Фудзі з пагадай Чурэйта ў Японіі. Здымак ілюстрацыйны. Фота: vecteezy.com

«Учора ў нас забраніравалі самы дарагі тур за нашу гісторыю. Японія з вылетам з Мінска за 22 728$ на 10 дзён. Засталося дачакацца пацвярджэння візы і пажадаць добрага адпачынку», — напісалі на старонцы турагенцтва.

Як вынікае з прыкладзенага скрыншота, кліенты ўжо ўнеслі і перадаплату памерам 7759 даляраў, ці ў эквіваленце 22578 рублёў.

З далейшых тлумачэнняў у каментарах высветлілася, што гэта тур на дзве асобы, і ў ім «усё VIP». Што менавіта ў гэта ўваходзіць, удакладняць агенцтва не стала.

«2 чалавекі, бізнэс-пералёты, VIP-гатэлі, 10 дзён», — такі быў лаканічны адказ на адпаведнае пытанне.

Праз якія прамежкавыя пункты робіцца пералёт, таксама пэўнасці няма — ці то праз Дубай, ці праз Пекін.

Людзі ў каментарах за падарожнікаў парадаваліся, хоць, як многія жартавалі, «не ад усёй душы».

Цэны пры гэтым здаліся «завоблачна дзіўнымі».

Адзін з карыстальнікаў адзначыў, што «ў Антарктыду танней», з чым агенцтва пагадзілася.

Іншыя дзяліліся сваім уласным вопытам, калі падарожжы ў далёкія краіны абыходзіліся куды танней:

«Мы з хлопцам на месяц [у Японію] лёталі і з пражываннем ды квіткамі патрацілі 2900$»;

«У Кенію на сафары — столькі каштавалі пералёт, гатэлі, уезд у парк, без харчавання — сям'я 2+2. У вас ёсць да чаго імкнуцца».

Каментары да артыкула