На свой дзень нараджэння Зяленскі з Наўроцкім, Наўседам і Ціханоўскай у Вільні ўшануе памяць Кастуся Каліноўскага
Гэта не проста пратакольны візіт, а сімвалічны жэст, які падкрэслівае адзінства чатырох нацый і гатоўнасць разам бараніць сваю свабоду і незалежнасць.
Гітанас Наўседа сустракае Уладзіміра Зяленскага ў Вільні, 25 студзеня 2026. Фота: AP Photo / Mindaugas Kulbis
25 студзеня, у нядзелю, Вільню наведаюць прэзідэнты Украіны Уладзімір Зяленскі і Польшчы Караль Наўроцкі. Разам з прэзідэнтам Літвы Гітанасам Наўседам яны возьмуць удзел у памятных мерапрыемствах. Нагода для сустрэчы на вышэйшым узроўні — гадавіна Паўстання 1863—1864 гадоў.
У цырымоніі мае ўдзельнічаць і Святлана Ціханоўская.
Гэта не проста пратакольны візіт, а сімвалічны жэст, які падкрэслівае адзінства чатырох нацый і гатоўнасць разам бараніць сваю свабоду і незалежнасць. Асаблівасць моманту надае тое, што 25 студзеня — дзень нараджэння Уладзіміра Зяленскага.
Уладзіміру Зяленскаму сёння споўнілася 48 гадоў.
Менавіта ў Вільні, на Лукішскай плошчы, былі пакараныя смерцю лідары паўстання, у тым ліку беларускі нацыянальны герой Кастусь Каліноўскі. У 2019 годзе іх цудам, у выніку апоўзня на гары Гедыміна, знойдзеныя парэшткі былі ўрачыста перапахаваныя ў капліцы на могілках Роса.
У капліцы, дзе спачываюць парэшткі паўстанцаў. Фота: Наша Ніва
24 студзеня ўшанаванне памяці паўстанцаў прайшло ў Варшаве. Вянкі ўсклалі прэзідэнты Польшчы і Літвы Караль Наўроцкі і Гітанас Наўседа. У цырымоніі ўзялі ўдзел таксама Святлана Ціханоўская і Павел Латушка.
Архіўнае фота: Святлана Ціханоўская ўскладае вянок на могілках Роса. Фота: ОСЦ
Імя Кастуся Каліноўскага носіць полк беларускіх добраахвотнікаў ва Украіне.