Нявестка Бэкхэмаў. Што вядома пра Ніколу Пэльц, якая пасварылася з Дэвідам і Вікторыяй

Актрыса. Сцэнарыстка. Рэжысёрка. І абаронца сабак. Менавіта так Нікола Пэльц Бэкхэм апісвае сябе ў сваім профілі ў Instagram.

Фота: Allen Berezovsky/Getty Images

31‑гадовая жонка Брукліна Бэкхэма нядаўна апынулася ў эпіцэнтры медыйнага скандалу пасля рэзкага допісу яе мужа ў сацыяльных сетках, скіраванага супраць яго зорных бацькоў — Дэвіда і Вікторыі Бэкхэм, паведамляе Бі-бі-сі.

Хаця шырокая публіка даведалася пра Ніколу перадусім пасля яе шлюбу са старэйшым сынам знакамітай пары, насамрэч яна ўжо даўно жыве ўласным, цалкам самастойным жыццём — як актрыса, аўтарка і спадкаемніца адной з самых уплывовых сем’яў Амерыкі.

Сям’я, грошы і дзяцінства ў Нью-Ёрку

Бацька Ніколы — мільярдэр Нэльсан Пэльц, адзін з заснавальнікаў інвестыцыйнага фонду ў Нью-Ёрку і былы член рады дырэктараў шэрагу міжнародных карпарацый, у тым ліку Heinz. Маці — Клаўдыя Гефнер, паспяховая мадэль 1980— 1990‑х гадоў.

У сям’і Пэльцаў восем дзяцей, а бацькі разам ужо больш за 40 гадоў.

Нікола вырасла ў Нью-Ёрку і, як яна распавядала ў інтэрв’ю 2019 года, шлях да акторскай кар’еры быў для яе не такім простым — спачатку бацькі былі супраць.

«У дзяцінстве я гуляла ў хакей на лёдзе, і тата вельмі хацеў, каб я засяродзілася менавіта на гэтым. Ён лічыў гэта неверагодна крутым, — успамінала яна. — Я гуляла на пазіцыі цэнтральнага і правага форварда.

Музыка, мода, кіно

Цікавасць да акторства ў Ніколы Пэльц з’явілася ў 11 гадоў — дзякуючы школьным заняткам драматычнага мастацтва, якія хутка сталі яе ўлюбёнымі.

«Я папрасіла маму дазволіць мне паспрабаваць сябе ў акторстве. Спачатку бацькі былі катэгарычна супраць, бо проста не разумелі, навошта мне гэта», — успамінала Нікола.

З часам бацькі зміраліся з яе выбарам і падтрымалі дачку.

У 2005 годзе яна атрымала сваю першую тэатральную ролю ў спектаклі «Чорны дрозд» на сцэне тэатральнага клуба Манхэтэна.

А за год да гэтага адбыўся яе кінадэбют у каляднай камедыі «Сардэчна запрашаем, або Суседзям уваход забаронены».

Далей былі ролі ў маштабных і вядомых праектах: «Апошні ўладар стыхій» рэжысёра М. Найта Ш’ямалана (2010), серыял «Матэль Бэйтса» (2013), у якім яна сыграла каханую Нормана Бэйтса, блокбастэр «Трансформеры: Эпоха вынішчэння» (2014), драматычны серыял «Калі запальваюцца вулічныя ліхтары» (2017).

Наступным крокам у кар’еры Ніколы стаў незалежны мастацкі фільм «Прыма», у якім яна выканала галоўную ролю балерыны. Побач з ёй на экране з’явіліся лаўрэаткі «Оскара» Фэй Данавей і Міра Сарвіна. Асаблівасць праекта ў тым, што сцэнар быў створаны на аснове гісторыі і персанажа, прыдуманых самой Пэльц Бэкхэм.

Нікола таксама здымалася ў музычных кліпах, у тым ліку ў Зэйна Маліка (It’s You) і Майлі Сайрус (7 Things).

Акрамя таго, яна працавала мадэллю для розных брэндаў, у прыватнасці для італьянскага дома Genny.

У 2024 годзе Нікола дэбютавала як рэжысёрка з фільмам «Лола», які яна не толькі зняла, але і напісала сцэнар, а таксама выканала галоўную ролю. Яе гераіня — маладая жанчына, якая спрабуе зарабіць грошы, каб выратаваць брата і вырваць яго з таксічнай сямейнай атмасферы.

Нікола неаднаразова прызнавалася, што з-за свайго прывілеяванага становішча сутыкаецца з жорсткай крытыкай.

«Мне часта пішуць злыя каментары ў Instagram — і так, я іх чытаю. Людзі кажуць: «Яна наогул не працуе»», — распавядае яна.

«Я разумею, чаму яны так думаюць. Я, напрыклад, не паказваю кожны крок працы над фільмам «Лола», але на самой справе ён ствараўся шэсць гадоў. Гэта быў вельмі доўгі і знясільваючы працэс».

Стужка атрымала змешаныя водгукі: рэйтынг гледачоў на Rotten Tomatoes — 56%, а The Guardian адзначыў, што фільм «эксплуатуе тэму чалавечых пакут».

Акрамя кар’еры, Нікола падтрымлівае догляд за жывёламі з прытулкаў. У 2022 годзе арганізацыя PETA адзначыла яе за ўклад у папулярызацыю адказнага стаўлення да жывёл.

Шлюб з Бруклінам і канфлікт з сям’ёй Бекхемаў

І ўсё ж менавіта адносіны з Бруклінам Бэкхэмам зрабілі Ніколу пастаяннай гераіняй таблоідаў — асабліва пасля іх раскошнага вяселля ў 2022 годзе. Бруклін распавядаў выданню Glamour, што ўпершыню сустрэў Ніколу на фестывалі Coachella, а пазней яны зблізіліся пасля вечарынкі на Хэлоўін.

Нікола неаднаразова падкрэслівала, наколькі для яе важная сям’я — і родная, і сям’я мужа.

У 2024 годзе ў інтэрв’ю Brydie яна шчыра дзялілася: «Сям’я для мяне — гэта ўсё, і я кажу гэта ад усяго сэрца. Я вельмі блізкая са сваімі роднымі і з сям’ёй Брукліна. Няма нічога лепшага, чым ведаць, што побач ёсць людзі, на якіх можна абаперціся. Гэта сапраўднае благаслаўленне, за якое я заўсёды ўдзячная».

Хаця Нікола дагэтуль публічна хваліць сваю сям’ю ў сацыяльных сетках, нядаўна стала вядома, што яна выдаліла са свайго профілю допіс з віншаваннем свякрухі Вікторыі Бэкхэм з 50-годдзем.

Цяпер Нікола і Бруклін апынуліся ў цэнтры гучнага канфлікту з Дэвідам і Вікторыяй пасля таго, як Бруклін у Instagram заявіў, што не мае намеру мірыцца з сям’ёй на фоне сур’ёзнага разрыву.

Каментары да артыкула