У Літве прапануюць падоўжыць нацыянальныя санкцыі супраць расейцаў і беларусаў да 2028 года
Пры гэтым размова не ідзе пра новыя абмежаванні.
У сувязі з працягам расійскай вайны ва Украіне, Міністэрства замежных спраў Літвы прапануе падоўжыць нацыянальныя санкцыі супраць грамадзян Расіі і Беларусі да 2028 года, паведамляе LRT.
«Мы прапануем падоўжыць тэрмін дзеяння закона і абмежавальных мер, прадугледзеўшы падаўжэнне не на адзін год, а да 31 снежня 2027 года. Такая прапанова не супярэчыла б прынцыпу прапарцыянальнасці і таму факту, што абмежавальныя меры з’яўляюцца часовымі і падлягаюць перагляду», — гаворыцца ў тлумачальнай запісцы да праекта.
Да гэтага часу Сейм падаўжаў абмежавальныя меры для грамадзян Расіі і Беларусі тэрмінам на адзін год. Тэрмін дзеяння мер, падоўжаных у мінулым годзе, сканчваецца 2 мая 2026 года.
Паводле звестак МЗС, падаўжэнне закона забяспечыць Літве магчымасць у сувязі з вайной Расіі супраць Украіны дадаткова, нароўні з санкцыямі ЕС, прымяняць на нацыянальным узроўні абмежавальныя меры ў дачыненні да дзяржаў-агрэсараў у якасці інструмента знешняй палітыкі.
Таксама рашэннем Урада можна будзе замарожваць грашовыя сродкі і эканамічныя рэсурсы, а таксама прымяняць сектарныя абмежаванні, калі меры, устаноўленыя на ўзроўні ЕС у дачыненні да Расіі ці Беларусі, перастануць дзейнічаць або будуць адменены.
Пры гэтым МЗС не прапануе ўводзіць новыя абмежаванні.
«Комплекс абмежавальных мер, вызначаны законам, ацэньваецца як аптымальны і збалансаваны; перад тварам існуючых пагроз гэтыя меры неабходныя і мэтазгодныя, прымяняюцца выключна як рэакцыя на бягучыя пагрозы, і іх прымяненне не створыць нязручнасцяў для жыхароў Літвы», — сцвярджаецца ў дакуменце.
Пры штогадовым падаўжэнні нацыянальных санкцый больш за ўсё дыскусій у парламенце ўзнікае з-за таго, што для грамадзян Расіі і Беларусі прадугледжаны розныя абмежавальныя меры. Частка палітыкаў прапануе іх уніфікаваць, аднак большасць членаў Сейма вырашалі інакш.
Асноўныя палажэнні закона:
-
Заявы грамадзян Расіі і Беларусі на выдачу як нацыянальных, так і шэнгенскіх віз больш не прымаюцца (за выключэннем выпадкаў пры пасярэдніцтве МЗС).
-
Расіянам больш не выдаюцца дазволы на жыхарства ў Літве, за выключэннем выпадкаў, калі яны ўжо маюць дзейную візу або ДНЖ краіны ЕС.
-
У дачыненні да грамадзян Расіі (і з ацэнкай рызык для грамадзян Беларусі) прымяняецца індывідуальная дадатковая дэтальная праверка пры ўездзе.
-
Больш не прымаюцца заявы на статус электроннага рэзідэнта Літвы (акрамя тых, хто ўжо мае ДНЖ).
-
Расіянам без ДНЖ забаронена набываць нерухомасць.
-
Забаронены ўвоз і вываз наяўных грошай — украінскіх грыўняў, а таксама імпарт сельскагаспадарчых прадуктаў і кармоў з Расіі ці Беларусі.
-
Грамадзяне Расіі пазбавяцца часовага ДНЖ, калі на працягу апошніх трох каляндарных месяцаў больш за адзін раз адправяцца ў Расію ці Беларусь (выключэнне — перавозчыкі і аб’ектыўныя прычыны).