Прэзідэнт Linava: Праблема літоўскіх фур у Беларусі будзе вырашацца толькі ў наступным годзе
«Настрой у перавозчыкаў кепскі. Ніякага руху грузавікоў няма».
Літоўскія цягачы, якія затрымаліся ў Беларусі, дагэтуль не могуць пакінуць суседнюю краіну, заявіў прэзідэнт асацыяцыі Linava Эрландас Мікенас. Паводле яго слоў, перавозчыкі не спадзяюцца на «калядны цуд» і лічаць, што праблема з цягачамі перанясецца на наступны год, піша Delfi.lt.
«Настрой у перавозчыкаў кепскі. Ніякага руху грузавікоў няма, а інфармацыя, якой дзеліцца прэм’ер-міністр, — я не ўяўляю, адкуль яна яе ўзяла і хто ёй гэта сказаў. Мы кантактавалі з калегамі ў Польшчы і ў Беларусі, і, паводле нашых звестак, сітуацыя такая ж, як і раней: цягачы затрымаліся і не могуць перамяшчацца», — сказаў Мікенас.
«Каляды, як кажуць, час цудаў. Перавозчыкі спадзяваліся, што да святаў сітуацыя зменіцца, але цяпер надзей няшмат. Я перакананы, што праблема пяройдзе ў наступны год», — працягнуў ён.
Паводле яго слоў, урад не адрэагаваў на пратэст Linava на праспекце Гедыміна ў Вільні. «Пасля пратэсту, падчас якога мы перадалі ўраду петыцыю з патрабаваннямі, ніякага адказу не было», — адзначыў Мікенас.
Ён запэўніў, што звесткі пра колькасць цягачоў у Беларусі правільныя, але не можа гарантаваць, што афіцыйныя даныя перададзеныя ўраду.
«У нас тыя ж самыя звесткі — у Беларусі затрымаліся 4000 літоўскіх цягачоў. Праўда, афіцыйныя даныя мы самі перадаць не можам, бо ў Літве ёсць яшчэ некалькі асацыяцый і незалежных кампаній, звестак якіх у нас няма. У любым выпадку толькі цягачоў Linava, я гарантую, там больш, чым паведамляе ўрад або Мытны дэпартамент», — сказаў Мікенас. «Афіцыйныя даныя з усімі нумарамі аўтамабіляў яшчэ ўзгадняюцца», — дадаў ён.
У аўторак міністр транспарту Юрас Тамінскас заявіў журналістам, што не можа пацвердзіць гэтую інфармацыю.
Паводле яго слоў, Linava спачатку павінна падлічыць, колькі цягачоў знаходзіцца ў Беларусі, і падаць даныя ўраду. Ён падкрэсліў, што пакуль Linava не падасць гэтыя звесткі, гэтае пытанне абмяркоўвацца не будзе. Паводле Тамінскаса, дазволы на выезд транспарту на Усход выдае Літоўская адміністрацыя бяспечнага транспарту, паводле даных якой такія дазволы маюць 2600 цягачоў.
Мікенас сцвярджае, што гэтыя звесткі неактуальныя, бо перавозчыкі большую частку дазволаў набываюць непасрэдна ў Беларусі.
«Калі міністр пра гэта не ведае або не звяртае на гэта ўвагі, тады складана нешта казаць», — адзначыў кіраўнік асацыяцыі Linava.
Раней паведамлялася, што, паводле падлікаў Linava, страты перавозчыкаў дасягаюць 100 млн еўра і працягваюць расці. Абноўленыя даныя асацыяцыя прадставіць у пачатку студзеня.