У Турцыі разбіўся самалёт з начальнікам Генштаба Лівіі на борце
У небе над Турцыяй знік з радараў прыватны самалёт Falcon 50, на борце якога знаходзіўся начальнік Генеральнага штаба лівійскай арміі. Пра гэта паведамілі турэцкія СМІ.
Самалёт вылецеў з аэрапорта Анкары, пасля чаго яго перасталі фіксаваць радыёлакацыйныя сістэмы. У сувязі з інцыдэнтам турэцкія ўлады часова закрылі паветраную прастору над сталіцай.
Па звестках выдання Gündem 7x24, пошукава-выратавальныя службы знайшлі абломкі гэтага самалёта. Паведамляецца, што рэшткі паветранага судна былі знойдзеныя на тэрыторыі правінцыі Анкара.
Мясцовыя жыхары паведамляюць, што неўзабаве пасля ўзлёту чулі ў небе гук, падобны да выбуху.
У сацсетках з'явілася і відэа меркаванага крушэння самалёта.
Міністр унутраных спраў Турцыі паведаміў, што ў самалёце было пяць чалавек, у тым ліку кіраўнік Генштаба Лівіі генерал Махамед Алі аль-Хадад. Раней у той жа дзень ён сустракаўся з міністрам абароны Турцыі.
Кіраўнік урада нацыянальнага адзінства Лівіі Абдэль Хамід Дбейба пазней пацвердзіў, што начальнік Генштаба Лівіі генерал Мухамед Алі Ахмед Аль-Хадад і асобы, якія яго суправаджалі, загінулі ў выніку крушэння самалёта каля Анкары. Яго словы перадало агенцтва Libyan News Agency.
Чытайце таксама:
Лівійскія сілавікі вучацца ў Беларусі разганяць пратэсты
У Мінску адкрылася гандлёвае прадстаўніцтва Лівіі
У Еўропе выклікалі занепакоенасць авіярэйсы з Беларусі ў Лівію