Матацыклы, квадрацыклы, лодкі могуць забраць у беларусаў для войска падчас мабілізацыі
Міністэрства абароны Беларусі зацвердзіла пастанову №29, якая пашырае спіс транспарту, які грамадзяне і арганізацыі абавязаны перадаваць войску ў перыяд мабілізацыі ці ў ваенны час. Дакумент, падпісаны Віктарам Хрэніным, апублікаваны на Нацыянальным прававым інтэрнэт-партале.
Фота: vecteezy.com
Галоўным новаўвядзеннем стала ўключэнне ў пералік матацыклаў і малых суднаў, якія падлягаюць дзяржаўнай рэгістрацыі. Таксама ў спіс дададзены квадрыцыклы і снегабалотаходы.
Згодна з пастановай, дзяржаўныя органы і арганізацыі ўсіх формаў уласнасці абавязаны не толькі ўлічваць, але і рыхтаваць тэхніку (у тым ліку ўзятую ў лізінг) для патрэб Узброеных Сіл. Гэта прадугледжвае стварэнне камплектаў запчастак, інструментаў і абсталявання для перавозкі асабовага складу.
Цяпер у спісе тэхнікі, якую могуць забраць у грамадзян і кампаній:
легкавыя аўто з колавай формулай 4×4;
аўтобусы і грузавікі ўсіх тыпаў (бартавыя, самаскіды, рэфрыжэратары, фургоны);
спецыяльныя і грузапасажырскія аўтамабілі;
седлавыя цягачы і прычэпы;
трактары і самаходныя машыны;
квадрацыклы, малыя судны і матацыклы.
Поўны спіс глядзіце тут.