У Турцыі ўпаў беспілотнік — як мяркуецца, расійскі
Беспілотнік упаў непадалёк ад Стамбула.
Фота: Wikimedia Commons
Беспілотнік тыпу «Арлан-10» упаў у правінцыі Коджаэлі, недалёка ад Стамбула, паведамляе МУС Турцыі.
«Быў знойдзены беспілотны лятальны апарат, меркавана расійскай вытворчасці, тыпу «Арлан-10», які выкарыстоўваецца для разведкі і назірання», — гаворыцца ў паведамленні ведамства.
МУС праводзіць расследаванне абставін здарэння.
Як распавёў газеце Hurriyet мясцовы жыхар, беспілотнік упаў у сераду, аднак ён не паведаміў пра гэта адразу, бо падумаў, што ў дрона ёсць уладальнік.
Гэта ўжо другое паведамленне пра падзенне беспілотніка на тэрыторыі Турцыі на гэтым тыдні. 15 снежня Міністэрства абароны краіны паведаміла, што турэцкія вайскоўцы збілі «дрон, які выйшаў з-пад кантролю», над Чорным морам.
Паводле інфармацыі з адкрытых крыніц, беспілотнікі «Арлан-10» маюць далёкасць палёту да 600 кіламетраў і працягласць палёту да 16 гадзін, могуць несці нагрузку да пяці кілаграмаў, піша Расійская служба Радыё Свабода.
Расійскі бок паведамленні пра падзенне дронаў у Турцыі не каментаваў.