Выставілі на продаж папулярную сетку цацачных крам
У Беларусі выставілі на продаж вядомую сетку крамаў дзіцячых цацак FUNtastik. Аб’ява з’явілася на платформе biz24. Сетка належыць кампаніі «Краіна цацак», якая ўваходзіць у групу бізнэсмена Уладзіміра Васілёнка, піша Office Life.
Фота: ТРК Triniti
Год таму кампанія запускала новы фармат — крамы пад брэндам «Беларуская цацка», і першы такі гандлёвы пункт адкрыўся ў мінскім ГЗЦ «Чэрвеньскі».
На сайце FUNtastik цяпер пазначаныя 22 крамы, якія працуюць у Мінску і іншых гарадах: Магілёве, Гродне, Брэсце, Віцебску, Рэчыцы, Баранавічах. Акрамя таго, ёсць дзве крамы пад брэндам «Беларуская цацка», дзе прапануецца толькі прадукцыя мясцовых вытворцаў.
Як удакладнілі журналісты ў кампаніі, пакупнікам прапануюць на выбар — або набыць увесь бізнэс цалкам, або купіць асобныя гандлёвыя аб’екты ў рэгіёнах. Магчыма нават проста набыць абсталяванне канкрэтнай крамы. Цана не фіксаваная і залежыць ад фармату здзелкі. Паводле слоў прадстаўнікоў кампаніі, да прапанаванага бізнэсу ўжо праяўляюць цікавасць.
Пакупніку абяцаюць працу ўжо наладжаных магазінаў з устойлівым патокам кліентаў, сфармаванай камандай, устаноўленымі стандартамі абслугоўвання, касавай сістэмай, наладжаным улікам тавару і дзейнай анлайн-падтрымкай — сайтам funtastik.by і сацсеткамі праекта.
Чытайце таксама:
Дзе ў Мінску будуць працаваць елачныя базары — спіс адрасоў
У Мінску завяршаецца сезон сельгаскірмашоў. Дзе іх можна наведаць на выходных
У якім горадзе Еўрасаюза на першым месцы беларускі бізнэс?
Памідоры па 30 рублёў і хатняя каўбаса па 55: што прадаюць на элітным рынку Валяр'янава