Памёр архітэктар Фрэнк Геры. Сярод яго работ — музей Гугенхайма ў Більбаа
Фрэнк Геры, адзін з самых уплывовых архітэктараў мінулага стагоддзя, памёр ва ўзросце 96 гадоў. Сусветную вядомасць у 1997 годзе яму прынёс праект Музея Гугенхайма ў Більбаа, піша Бі-бі-сі.
Фота: Presley Ann/Getty Images for The Museum of Contemporary Art (MOCA
Геры нарадзіўся ў Таронта ў 1929 годзе, але падлеткам ён пераехаў у Лос-Анджэлес, каб вывучаць архітэктуру ва Універсітэце Паўднёвай Каліфорніі, а затым прайшоў далейшае навучанне ў Гарвардскай вышэйшай школе дызайну ў 1956 і 1957 гадах.
Адкрыўшы ўласнае бюро, ён адышоў ад традыцыйных архітэктурных прынцыпаў сіметрыі, выкарыстоўваючы нетрадыцыйныя геаметрычныя формы і неапрацаваныя матэрыялы ў стылі, які цяпер вядомы як дэканструктывізм.
«Я бунтаваў супраць усяго», — казаў Геры ў інтэрв'ю New York Times у 2012 годзе.
Музей Гугенхайма. Фота: Joaquin Gomez Sastre/NurPhoto via Getty Images
Яго пакрыты тытанам праект Музея Гугенхайма ў Більбаа прынёс яму сусветную вядомасць у 1997 годзе.
Гэтая праца зрабіла яго надзвычай запатрабаваным, і ён працягнуў ствараць культавыя збудаванні ў гарадах па ўсім свеце: павільён Джэя Прытцкера ў парку Чыкага, комплекс будынкаў Der Neue Zollhof у Германіі і будынак Louis Vuitton Foundation у Парыжы.
«Ён падарыў Парыжу і Францыі свой найвялікшы шэдэўр», — сказаў Бернар Арно, генеральны дырэктар LVMH, якой належыць Louis Vuitton.
Яго стыль, шмат у чым непрадказальны, не дазваляў дзвюм яго працам выглядаць аднолькава.
Фота: Nano Calvo/VW Pics/Universal Images Group via Getty Images
«Танцуючы дом» у Празе выглядае як шкляны будынак, які складаецца сам у сябе; яго гатэль Marques у Іспаніі ўпрыгожаны тонкімі лістамі хвалістага рознакаляровага металу; яго праект бізнес-школы ў Сіднэі нагадвае карычневы папяровы пакет.
Геры атрымаў прэстыжную Прытцкераўскую прэмію за ўклад у архітэктуру ў 1989 годзе, калі яму было 60 гадоў; яго працы былі ахарактарызаваны як тыя, што маюць «высокаўтончаную, вытанчаную і смелую эстэтыку».
«Яго праекты, калі параўноўваць з амерыканскай музыкай, лепш за ўсё можна было б параўнаць з джазам — поўным імправізацыі і жывога, непрадказальнага духу», — казала тады журы Прытцкераўскай прэміі.
Геры быў удастоены Ордэна Канады ў 2002 годзе і Прэзідэнцкага медаля Свабоды — найвышэйшай грамадзянскай узнагароды ЗША — у 2016 годзе. У Геры засталіся дзве дачкі ад першага шлюбу — Леслі і Брына; а таксама двое сыноў — Алехандра і Самуэль — ад другога шлюбу з Бертай Ісабель Агілера.