Што будзе жыхару Гомельшчыны, які забіў сваю 9‑гадовую сястру? Абсалютна нічога
Забойства адбылося 34 гады таму, але гаворка нават не пра тэрміны даўніны.
Следчыя заявілі, што раскрылі забойства 9‑гадовай дзяўчынкі, чый труп знайшлі ў лістападзе 1991 года на пустцы ў адным з раённых цэнтраў Гомельшчыны.
Высветлілася, што яе забіў родны брат, якому на той момант было 11 гадоў. За некалькі дзён да трагедыі ён скраў з тэрыторыі школы ровар. Сястра гэта ўбачыла і прыгразіла расказаць бацьку.
Вяртаючыся дадому пасля ўрокаў, хлопчык паваліў дзяўчынку на зямлю і задушыў. Затым аднёс цела на пустку, зняў усё адзенне і замаскіраваў сухой травой.
Цяпер забойцу ўжо 45 гадоў, у свой час яго некалькі разоў судзілі за крадзяжы.
Але што яму будзе цяпер за забойства?
Нічога. У Беларусі ўзрост крымінальнай адказнасці за забойства складае 14 гадоў. 11‑гадовага хлопчыка не пакаралі б тады — нават калі б адразу вызначылі віну, — не пакараюць і цяпер.
Хлопчыка маглі прыцягваць да нейкіх выхаваўчых мераў, бацькі неслі б за яго матэрыяльную адказнасць, але ў любым выпадку пра крымінальны пераслед гаворкі не ішло б.