На Мальдывах забаранілі курыць усім, хто нарадзіўся пазней за 2006 год

Мальдывы сталі першай краінай у свеце, дзе ўводзіцца поўная забарона на курэнне для маладога пакалення. Цяпер на тэрыторыі архіпелага нельга будзе курыць, а таксама купляць або прадаваць тытунёвыя вырабы тым, хто нарадзіўся пасля 1 студзеня 2007 года — у тым ліку турыстам, піша Бі-бі-сі.

Здымак ілюстрацыйны. Фота: freepik.com

Як паведаміла Міністэрства аховы здароўя Мальдываў, гэта рашэнне «адлюстроўвае цвёрдую прыхільнасць урада абараняць моладзь ад шкоднага ўздзеяння тытуню».

Па словах Ахмеда Афаала, намесніка старшыні рады па барацьбе з курэннем, гэты крок стаў лагічным працягам леташняга рашэння забараніць вэйпінг. Ён адзначыў, што электронныя цыгарэты — гэта «хітрасць індустрыі, накіраваная на прыцягненне маладых людзей да шкоднай звычкі».

Новы закон ахоплівае ўсе віды тытунёвых вырабаў. Прадаўцы абавязаныя правяраць узрост пакупнікоў. Гэта таксама адпавядае міжнародным абавязацельствам Мальдыўскіх астравоў у межах Рамачнай канвенцыі Сусветнай арганізацыі аховы здароўя па барацьбе супраць тытуню.

Забарона распаўсюджваецца і на турыстаў. Тым, хто нарадзіўся пасля 2007 года, курыць на Мальдывах будзе нельга. Аднак улады перакананыя, што гэта не паўплывае на турыстычны паток.

«Людзі прыязджаюць на Мальдывы не дзеля курэння, а дзеля пляжаў, мора, сонца і свежага паветра», — падкрэсліў Афаал. Паводле прагнозаў, на наступны год краіну наведаюць больш за два мільёны турыстаў.

Дарэчы, падобныя забароны ўжо разглядаліся ў іншых краінах. У Новай Зеландыі план паэтапнай забароны курэння быў адкладзены новым урадам у 2023 годзе, а ў Вялікабрытаніі закон, які забараняе продаж тытуню людзям, народжаным пасля 2009 года, усё яшчэ на разглядзе парламента.

Каментары да артыкула