Трамп загадаў Пентагону падрыхтавацца да магчымых ваенных дзеянняў у Нігерыі
Прэзідэнт ЗША заявіў, што даручыў Пентагону падрыхтавацца да магчымых ваенных дзеянняў у Нігерыі праз гвалт у адносінах да хрысціян.
Вызваленыя жанчыны і дзеці, якіх трымалі ў палоне баевікі. Фота: AP Photo/Jossy Olatunji, File
«Калі ўрад Нігерыі працягне дапускаць забойствы хрысціянаў, ЗША неадкладна спыняць усякую дапамогу Нігерыі і цалкам могуць уварвацца ў гэтую зганьбленую краіну са зброяй у руках, каб поўнасцю знішчыць ісламісцкіх тэрарыстаў, якія здзяйсняюць гэтыя жудасныя зверствы», — напісаў Трамп у сваёй сацсетцы Truth.
Кіраўнік Міністэрства абароны ЗША Піт Хэгсет заявіў, што Пентагон пачаў падрыхтоўку да магчымых ваенных дзеянняў, паведамляе Расійская служба Радыё Свабода.
«Забойства нявінных хрысціянаў у Нігерыі — і дзе б то ні было — павінна быць неадкладна спынена. Альбо ўрад Нігерыі абароніць хрысціянаў, альбо мы знішчым ісламісцкіх тэрарыстаў, якія здзяйсняюць гэтыя жудасныя зверствы», — напісаў ён у сацсетцы X.
Нігерыя пакуль не адрэагавала на пагрозу Трампа.
Напярэдадні адміністрацыя прэзідэнта ЗША зноў уключыла Нігерыю ў спіс краін, «якія выклікаюць асаблівую занепакоенасць». У гэты спіс уваходзяць дзяржавы, якія, на думку ЗША, парушаюць свабоду веравызнання.
У суботу прэзідэнт Нігерыі Бола Тынубу адхіліў гэтыя абвінавачанні.
«Характарыстыка Нігерыі як краіны з рэлігійнай нецярпімасцю не адлюстроўвае нашу нацыянальную рэальнасць і не ўлічвае паслядоўныя і шчырыя намаганні ўрада па абароне свабоды веравызнання і перакананняў для ўсіх нігерыйцаў», — перадае словы Тынубу агенцтва Reuters.
Міністэрства замежных спраў Нігерыі ў асобнай заяве паабяцала працягваць барацьбу з экстрэмізмам і выказала надзею на тое, што Вашынгтон застанецца блізкім саюзнікам краіны.
Аб якіх баевіках-ісламістах ідзе гаворка?
Ваенізаваныя ісламісцкія групоўкі «Бока Харам» і «Ісламская дзяржава ў Заходняй Афрыцы» тэрарызуюць жыхароў паўночна-ўсходняй часткі краіны ўжо больш за дзесяць гадоў, паведамляе Бі-бі-сі
Паводле звестак урада, за гэтыя гады ад рук баевікоў загінулі дзясяткі тысяч чалавек.
За 15 гадоў з моманту, калі джыхадзісты пачалі ваенныя дзеянні на паўночным усходзе краіны, мільёны людзей былі вымушаныя пакінуць свае дамы.
Аднак паводле дадзеных маніторынгавай групы Acled, з 2024 года колькасць людзей, забітых у выніку нападаў джыхадзістаў на фермераў, больш чым падвоілася.
У цэнтральнай частцы Нігерыі таксама адбываюцца сутыкненні паміж пастухамі, пераважна мусульманамі, і фермерамі, часта хрысціянамі, за доступ да вады і пашаў.
Ахвярамі падобных сутыкненняў паводле прынцыпу «вока за вока» таксама сталі тысячы чалавек, але, паводле ацэнак праваабаронцаў, зверствы маглі здзяйсняць усе бакі канфліктаў, і няма звестак, што атакі накіраваныя пераважна супраць хрысціян.