Ціханоўскую на вячэры ў Макрона сустракалі ганаровай вартай
Прэс-сакратарка Святланы Ціханоўскай Ганна Красуліна расказала пра ўчорашні візіт беларускай лідэркі ў прэзідэнцкі палац у Францыі.
«Запрашэнне да прэзідэнта Францыi Эмануэля Макрона ў Елісейскі палац мае эксклюзіўны статус, і такім чынам прэзідэнт ушаноўвае найбольш важных гасцей. Як правіла, спіс запрошаных не агучваецца, і тое, што абмяркоўваецца на самой вячэры — застаецца канфідэнцыйным», — расказала Ганна Красуліна.
Па яе словах, мерапрыемства адбываецца згодна з цырыманіялам. Гасцей — а збольшага гэта лідары дзяржаў і міжнародных арганізацый — сустракае ганаровая варта.
«Удзел Святланы Ціханоўскай, як беларускай прадстаўніцы — мае і сімвалічнае і палітычнае значэнне, гэта таксама і знак салідарнасці з беларускім народам, і падтрымкі беларускаму грамадству. Гэта магчымасць наўпрост перагаварыць з вядучымі палітыкамі свету пра сітуацыю ў Беларусі і крокі па яе вырашэнні», — зазначыла прэс-сакратарка.
Ганаровая варта Рэспубліканскай гвардыі. Ілюстрацыйнае фота Wikimedia Commons
Яна падкрэсліла, што вячэра адбываецца без прэсы і без пабочных гасцей. Святлану Ціханоўскую пасадзілі побач з міністрам замежных справаў Францыі Жанам-Ноэлем Баро і дарадцам прэзідэнта Макрона.