На скандал з Андрэем Павуком адрэагаваў мэр Вільні
Моўны скандал, у які трапіў Андрэй Павук, які нядаўна пачаў працаваць кіроўцам тралейбуса ў Вільні, выклікаў рэзананс у літоўскім грамадстве. Павук сам апублікаваў відэа, як ён пасварыўся з дыспетчаркай, што тая не размаўляе з ім па-руску. На сітуацыю адрэагаваў мэр горада Валдас Бянкунскас.
Валдас Бянкунскас. Фота: valdas.benkunskas / Facebook
Паводле слоў Валдаса Бянкунскаса, такія паводзіны непрымальныя і дэманструюць непавагу да дзяржаўнай мовы Літвы і да калег, піша Made in Vilnius.
Ён назваў паводзіны Андрэя Павука, «абсалютна недапушчальнымі». «Такімі паводзінамі грамадзянін Беларусі прадэманстраваў непавагу да нашай дзяржаўнай мовы і супрацоўнікаў Віленскага грамадскага транспарту», — сказаў Валдас Бянкунскас.
Ён падкрэсліў, што падтрымлівае дыспетчарку, якая адмовілася размаўляць па-руску. «У гэтай сітуацыі хачу абараніць дыспетчарку, якая выбрала не камунікаваць з кіроўцам на рускай мове, які за пяць гадоў жыцця ў Літве нават у такой элементарнай сітуацыі вырашыў гаварыць з калегамі на іншай мове», — сказаў ён.
Па словах Бянкунскаса, гэты выпадак адлюстроўвае больш глыбокую праблему — недахоп інтэграцыі замежнікаў і бяздзейнасць дзяржавы ў гэтай сферы.
Паводле яго слоў, дзяржава дагэтуль не стварыла эфектыўнай сістэмы навучання літоўскай мове для замежнікаў.
Мэр Вільні падкрэсліў, што сталіца возьме ініцыятыву і пакажа прыклад. «Гэтая дапамога будзе прызначана тым, хто прыехаў сюды працаваць не з краін ЕС, гарадская адміністрацыя магла б пакрыць выдаткі бюджэтных прадпрыемстваў на тое, каб навучыць літоўскай мове хаця б на мінімальным узроўні. Жадаючы рэальных перамен у дзяржаве, мы пачнём паказваць прыклад самі», — сказаў ён.
Паводле яго слоў, гэты крок — толькі пачатак, аднак неабходна больш шырокае супрацоўніцтва паміж установамі.
«Ясна разумею, што гэтай прапановай усіх праблем не вырашым. Дзяржава, бізнес і органы самакіравання павінны сесці за агульны стол і ствараць дзейсную сістэму інтэграцыі замежных грамадзян, размеркаваць выдаткі і адказнасць. Мы гатовыя пра гэта размаўляць і шукаць рашэнні», — рэзюмаваў Валдас Бянкунскас.