Названыя пераможцы прэміі імя Міхала Анемпадыстава
25 кастрычніка ў Бельску-Падляшскім (Польшча) падчас фестывалю «Бардаўская восень» адбылася цырымонія ўручэння прэміі імя Міхала Анемпадыстава за найлепшую вокладку кнігі, выдадзенай у 2024 годзе.
Фота: Радыё Рацыя
Пераможцамі сталі Ігар Юхневіч і Маша Мароз за афармленне кнігі «Мое баба — діректор морга» аўтаркі Голі з Ополя (самвыд, 2024).
Журы адзначыла працу дызайнераў «за выкшталцоны дызайн кнігі як арт-аб’екта, за паважлівае хуліганства і за вокладку, што не саромеецца быць адметнай».
Прэмія імя Міхала Анемпадыстава ўшаноўвае спадчыну выбітнага беларускага мастака, дызайнера і культуролага, які зрабіў значны ўплыў на развіццё візуальнай культуры Беларусі. Заснаваная ў 2019 годзе, яна адзначае найлепшыя дызайнерскія рашэнні ў афармленні кніжных вокладак і падтрымлівае развіццё сучаснага беларускага дызайну.
Арганізатары прэміі — Беларускі ПЭН і фонд «Open Culture», пры падтрымцы ТАА «H&L», кампаніі «Laut» і фестывалю «Бардаўская восень».