У мінскім метро хутка з'явяцца новыя цягнікі
Новыя саставы запусцяць на Аўтазаводскай лініі сталічнай падземкі.
Фота: «Метровагонмаш»
На расійскім заводзе «Метровагонмаш» (Мыцішчы) пачалася зборка новай партыі вагонаў метро для Мінска, паведамляе тэлеграм-канал мінскага метрапалітэна. Ужо выканана шумаізаляцыя і пакладзена падлогавае пакрыццё, цяпер рыхтуецца ўстаноўка дзвярэй, падвагоннага электраабсталявання і эвакуацыйных трапаў.
У адрозненне ад папярэдняй пастаўкі, новыя цягнікі будуць пяцівагоннымі і заменяць састарэлую тэхніку на Аўтазаводскай лініі. Усе яны паступяць у электрадэпо «Магілёўскае».
Кантракт на пастаўку 20 вагонаў мадэлі «Мінск-2024» быў падпісаны 27 лютага 2025 года.
Новыя вагоны будуць перададзены заказчыку ў лістападзе і снежні 2025 года.
У 2024 годзе сталіца атрымала 28 вагонаў, якія цяпер курсіруюць па ўчастку Зялёналужскай лініі.
Канструкцыю новых вагонаў распрацавала кампанія «ТМХ-Інжынірынг» паводле патрабаванняў мінскага метрапалітэна. У вытворчасці выкарыстоўваюцца і беларускія кампаненты, паведамляе канал.