Пад Магілёвам кіроўца збіў насмерць веласіпедыста і з'ехаў, яго затрымалі ў Мінскай вобласці
У нядзелю раніцай паблізу в. Брылі Магілёўскага раёна знайшлі цела 57‑гадовага веласіпедыста з прыкметамі наезду аўтамабіля. Кіроўца з месца здарэння з'ехаў.
Скрыншот відэа МУС
На працягу некалькіх гадзін фігуранта ўстанавілі і затрымалі на тэрыторыі Мінскай вобласці. Ім аказаўся 33‑гадовы жыхар Пухавіцкага раёна на Iveco, паведамляе прэс-служба МУС.
Кіроўца больш за 20 разоў прыцягваўся да адміністрацыйнай адказнасці за правапарушэнні, двойчы пазбаўляўся правоў за язду ў нецвярозым стане.
Дзяржаўтаінспекцыя нагадвае: пры здзяйсненні ДТЗ кіроўца абавязаны заставацца на месцы, па магчымасці аказаць дапамогу пацярпеламу, не перамяшчаць транспартны сродак, паведаміць пра здарэнне ў міліцыю і медыкам.