Міністарка абароны Літвы заклікала збіваць расійскія знішчальнікі
Міністарка абароны Літвы Давіле Шакалене, каментуючы заяву Эстоніі аб парушэнні яе паветранай прасторы расійскімі самалётамі нагадала пра сітуацыю 2015 года, калі турэцкія ВПС збілі расійскі самалёт Су-24.
Давіле Шакалене. Фота: Anna Ross/picture alliance via Getty Images
«Тры расійскія знішчальнікі над Талінам — яшчэ адзін цвёрды доказ таго, што [праграма НАТА] «Усходні вартавы» даўно наспеў. Паўночна-ўсходняя мяжа НАТА правяраецца не проста так. Мы павінны дзейнічаць сур'ёзна. Турцыя паказала прыклад 10 гадоў таму. Ёсць над чым задумацца», — напісала Шакалене ў сацсетцы Х.
24 лістапада 2015 года турэцкі знішчальнік F-16 збіў расійскі бамбавік Су-24 каля сірыйска-турэцкай мяжы. Турцыя сцвярджала, што расійскі экіпаж парушыў яе паветраную прастору, нягледзячы на шматлікія папярэджанні. Масква гэта адмаўляла, заяўляючы, што самалёт знаходзіўся выключна над тэрыторыяй Сірыі. Адзін з расійскіх пілотаў загінуў падчас прызямлення пасля катапультавання.
Раней паведамлялася, што Эстонія абвінаваціла тры расійскія знішчальнікі ў парушэнні сваёй паветранай прасторы, хоць у Міністэрстве абароны Расіі сцвярджаюць, што нібыта нічога такога не было. Прэзідэнт ЗША Дональд Трамп, даведаўшыся пра гэту сітуацыю, заявіў, што яна яму вельмі не падабаецца.
Чытайце таксама:
Два расійскія знішчальнікі правакацыйна праляцелі над польскай нафтавай платформай