Бацька страляў з пнеўматычнага пісталета ў дачку
Мужчына ў стане алкагольнага ап’янення зрабіў не менш як чатыры стрэлы з пнеўматычнага пісталета па сцёгнах 13‑гадовай дачкі.
У Гомелі распачата крымінальная справа супраць 42‑гадовага мужчыны, якога вінавацяць у наўмысным прычыненні цялеснага пашкоджання сваёй 13‑гадовай дачцэ. Паводле звестак пракуратуры Кастрычніцкага раёна, мужчына ў стане алкагольнага ап’янення зрабіў не менш як чатыры стрэлы з пнеўматычнага пісталета па яе сцёгнах.
Судова-медыцынская экспертыза пацвердзіла наяўнасць ран, што кваліфікуюцца як лёгкія цялесныя пашкоджанні.
Падазраваны раней неаднаразова прыцягваўся да крымінальнай і адміністрацыйнай адказнасці, у тым ліку за правапарушэнні ў стане ап’янення.
У гэтым выпадку дачка адмовілася ад напісання заявы, бо бацька з’яўляецца яе адзіным законным прадстаўніком — маці пазбаўлена бацькоўскіх правоў.
Нягледзячы на адсутнасць заявы ад непаўналетняй, пракурор палічыў неабходным распачаць справу, бо дзеянні мужчыны з’яўляюцца пагрозай жыццю і здароўю дзіцяці, якое не можа самастойна абараніць свае правы.
Дзяўчынку па рашэнні камісіі па справах непаўналетніх адабралі ў бацькі і часова размясцілі ў сацыяльна-педагагічным цэнтры.