Трамп заявіў, што Зяленскаму давядзецца пайсці на здзелку
Прэзідэнт ЗША Дональд Трамп заявіў перад вылетам з візітам у Вялікабрытанію, што прэзідэнту Украіны Уладзіміру Зяленскаму давядзецца заключыць здзелку для заканчэння вайны, піша «Еўрапейская праўда».
Дональд Трамп. Фота: Chip Somodevilla / Getty Images
Дональд Трамп зрабіў сваю заяву ў адказ на пытанне, ці сустрэнецца ён з Зяленскім у Нью-Ёрку, дзе збярэцца пасяджэнне Генасамблеі ААН.
«Яму давядзецца пайсці на здзелку, а Еўропа павінна спыніць купляць нафту ў Расіі», — сказаў ён.
Амерыканскі прэзідэнт дадаў, што, хутчэй за ўсё, яму давядзецца прысутнічаць на сустрэчы Зяленскага і прэзідэнта Расіі Уладзіміра Пуціна, калі яна адбудзецца.
«Патрэбныя двое, каб танцаваць танга. Гэтыя двое, Зяленскі і Пуцін, яны ненавідзяць адзін аднаго. Здаецца, мне давядзецца сядзець з імі ў адным пакоі, бо яны не могуць знаходзіцца там удваіх. Вялікая нянавісць паміж імі».
Раней амерыканскі сенатар-рэспубліканец Ліндсі Грэм заявіў, што Венгрыя і Славакія могуць сутыкнуцца з наступствамі, калі не спыняць купляць расійскую нафту. У сваю чаргу, прэзідэнт Украіны Уладзімір Зяленскі заклікаў кіраўніка Белага дома заняць «выразную пазіцыю» адносна санкцый супраць Расіі і гарантый бяспекі для Украіны, каб спыніць Пуціна і пакласці канец вайне.
Чытайце таксама:
Трамп можа сустрэцца з Зяленскім на наступным тыдні
Зяленскі: Пуцін спрабуе абдурыць Трампа і робіць усё магчымае, каб пазбегнуць санкцый
Еўрасаюз адказаў на патрабаванне Трампа адмовіцца ад расійскіх энергарэсурсаў