Трамп: Нянавісць паміж Зяленскім і Пуціным — непасцігальная
Прэзідэнт ЗША Дональд Трамп выказаў сумнеў наконт магчымасці прамых перамоваў паміж прэзідэнтам Украіны Уладзімірам Зяленскім і кіраўніком Расіі Уладзімірам Пуціным з-за іх глыбокай асабістай варожасці.
Уладзімір Пуцін і Уладзімір Зяленскі. Фота: Mikhail Metzel, Sputnik, Kremlin Pool Photo via AP; АР
Трамп падчас размовы з журналістамі чарговы раз пахваліўся, што яму ўдалося спыніць сем войнаў, але адначасова прызнаў, што завяршыць вайну Расіі супраць Украіны аказалася значна складаней, чым ён чакаў, піша «Украінская праўда».
«Я думаў, што гэта будзе для мяне лёгка. Але гэта аказалася цяжка», — сказаў амерыканскі лідар.
Ключавой перашкодай на шляху да міру ён назваў глыбокую асабістую непрыязнасць паміж лідарамі дзвюх краін.
«Нянавісць паміж Зяленскім і Пуціным — неспасцігальная», — заявіў Трамп.
Гэтая ацэнка прымусіла яго засумнявацца ў эфектыўнасці прамых перамоваў паміж Кіевам і Масквой.
Адказваючы на пытанне, ці верыць ён у магчымасць такіх перамоваў, Трамп сказаў: «Не ведаю. Думаю, мне давядзецца гаварыць самому».
Што да таго, калі такая размова можа адбыцца, прэзідэнт адказаў ухіліста, адзначыўшы, што гэта можа адбыцца «адносна хутка».
На ўдакладняючае пытанне, ці можа наступным крокам стаць трохбаковы саміт, Трамп адзначыў, што фармат не мае значэння.
«Будуць перамовы — ці вы назавяце гэта самітам, ці проста сустрэчай, не мае значэння. Але, імаверна, мне давядзецца прыняць удзел. Яны ненавідзяць адзін аднаго так моцна, што амаль не могуць размаўляць», — падсумаваў ён.
Расія ўварвалася ва Украіну ў 2022 годзе. Мэтай была ліквідацыя ўкраінскай дзяржаўнасці і расчляненне краіны. Аднак расійская армія натыкнулася на рашучы супраціў украінскай арміі і народа. У выніку ваенных дзеянняў каля 400 тысяч чалавек з абодвух бакоў загінулі, да 2 мільёнаў былі параненыя. Каля 10 мільёнаў украінцаў вымушаныя былі пакінуць свае дамы.