Журналіст Манцэвіч, блогеры Казлоў і Вінаградаў, палітык Кучук. паплечнікі Аўтуховіча і Статкевіча. Хто яшчэ з палітвязняў вызваліўся сёння?

Робяцца вядомымі ўсё больш прозвішчаў палітвязняў, вызваленых Лукашэнкам 11 верасня. Сярод іх — нямала вядомых асоб.

Дзмітрый Казлоў

У спісах вызваленых блогер Дзмітрый Казлоў «Шэры кот». Ён адбываў пакаранне ў калоніі для рэцыдывістаў у Мазыры.

Павел Вінаградаў

Таксама на свабодзе Павел Вінаградаў. Ён тройчы палітвязень

Галіна Дзербыш

Гродзенская пенсіянерка Галіна Дзербыш таксама вызваленая. Яна з групы Міколы Аўтуховіча.

Сяргей Спарыш

У спісе памілаваных Сяргей Спарыш, паплечнік Міколы Статкевіча.

Аляксандр Манцэвіч

Вызвалены рэдактар маладзечанскай «Рэгіянальнай газеты» Аляксандр Манцэвіч. Унук беларуса-палітвязня часоў міжваеннай Польшчы, гэты выбітны 67-гадовы журналіст адмовіўся прызнаць віну на працэсе над сабой, таму прысуд яму быў асабліва жорсткі.

Ілля Дубскі

На свабодзе Ілля Дубскі з Асіповічаў.

Мікалай Хіла

На свабодзе евангельскі прапаведнік Мікалай Хіла.

Гэты прапаведнік з царквы хрысціян-баптыстаў «Дабравесце» быў затрыманы ў 2024 годзе і асуджаны па артыкулах 361 (заклікі да захадаў абмежавальнага характару (санкцыяў), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь), ч. 1 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) суддзёй Аленай Ананіч. 

КДБ унёс гэтага верніка ў «спіс тэрарыстаў».

Дзмітрый Кучук

На свабодзе палітык Дзмітрый Кучук, лідар Партыі зялёных.

Яго затрымалі, калі ён прынёс кветкі да амбасады Расіі ў Мінску, каб ушанаваць памяць закатаванага ў расійскай калоніі Аляксея Навальнага. Кучука (на сёння яму 51 год), бізнэсоўца і кіраўніка незадоўга да таго забароненай экалагічнай партыі, абвінавацілі па арт. 342 Крымінальнага кодэкса: «масавыя беспарадкі».

Юлія Фенер

На свабодзе Юлія Фенер, жонка брытанскага дыпламата.

Яна была асуджаная зусім нядаўна, мае брытанскі і беларускі пашпарты.

Андрэй Крылоў

Вызваліўся 63-гадовы інжынер Андрэй Крылоў з Ваўкавыска.

Павел Нікіценка

Павел Нікіценка прыехаў на мяжу з бабруйскай калоніі

Работнік разлікова-даведкавага цэнтра з Віцебска атрымаў чатыры з паловай гады зняволення.

Віталь Бандарук

Сярод вызваленых Віталь Бандарук з Камянецкага раёна.

Якаў Шафарэнка

Якаў Шафарэнка з Брэста быў асуджаны за «масавыя беспарадкі». Цяпер ён на свабодзе.

Яўген Сямёнаў

Мінчук Яўген Сямёнаў сядзеў па шэрагу палітычных артыкулаў, а таксама за ўхіленне ад хатняй хіміі па наркатычным 328 артыкуле.

Глеб Гладкоўскі

Глеб Гладкоўскі быў затрыманы ў Брэсце за каментары пра загінулага кадэбіста. Ён вядомы арганізатар аэраздымак квадракоптарамі.

Святаслаў Шубіч

Cвятаслаў Шубіч быў у шклоўскай калоніі. Ён асуджаны па палітычных артыкулах, а таксама па наркатычным.

Андрэй Сцепанькоў

Андрэй Сцепанькоў з Рагачоўскага раёна быў асуджаны па 10 палітычных артыкулах.

Андрэй Хвескавец

Андрэй Хвескавец з Пінска быў удзельнікам паслявыбарчых падзей у сваім горадзе.

9 жніўня 2020 года жыхары горада выйшлі на пратэст супраць фальсіфікацыі выбараў. Яны спрабавалі заняць будынак гарвыканкама. Для падаўлення пратэстаў улады былі вымушаныя перакінуць у горад спецназ з Мінска.

Рэпрэсіі на Палессі закранулі тысячы людзей, сотні атрымалі доўгія турэмныя тэрміны: пераважна гэта простыя рабочыя.

Ігар Цяпцееў

Ігар Цяпцееў разам з сябрамі вывесіў украінскі і беларускі нацыяльнальны сцягі пасля падрыву ўкраінскай разведкай Крымскага моста.

За гэта яму прысудзілі тры з паловай гады зняволення.

Аляксей Сіленка

Вызвалены архітэктар і барабаншчык Аляксей Сіленка.

Максім Вінярскі

У спісах на вызваленне і вядомы актывіст Максім Вінярскі. Але незразумела, ці ён перайшоў мяжу, ці застаецца на нейтральнай паласе.

Каментары да артыкула