У Польшчы працуе каля 117 тысяч беларусаў
Беларусы на другім месцы сярод замежнікаў
У Польшчы працуе 1,067 мільёна замежнікаў, паведаміў Most са спасылкай на Галоўнае статыстычнае ведамства Польшчы. За год паказчык вырас на 5,5%.
Даныя пра занятасць замежнікаў публікуюцца з затрымкай. Інфармацыя, апублікаваная 9 верасня, паказвае сітуацыю па стане на 31 сакавіка 2025 года.
Больш за ўсё ў Польшчы занята ўкраінцаў — 714,9 тыс. Гэта на 3,6% больш, чым годам раней.
Беларусы — на другім месцы. Яны складаюць 11% занятых замежнікаў, гэта каля 117 тыс. чалавек. На трэцім — грузіны (2,3%, або каля 25 тыс. чалавек).
Структура занятасці насельніцтва ў Польшчы ў разрэзе грамадзянства. Крыніца: GUS
Амаль 38% замежнікаў працуюць не па працоўных, а па грамадзянска-прававых дамовах, то-бок дамовах даручэння працы (umowy zlecenie), агенцкіх ды інш.
У рэальнасці доля тых, хто не мае працоўнай дамовы, яшчэ большая. Але статыстычныя даныя не ўлічваюць тых, хто працуе па дамовах падраду (umowy o dzieło), а таксама занятых у якасці памочнікаў фермераў.
Каля 20% занятых замежнікаў выбіраюць сталічны рэгіён. Таксама ў лідарах Ніжнясілезскае, Вялікапольскае і Сілезскае ваяводствы.