Трамп зрабіў апошняе папярэджанне ХАМАС
Прэзідэнт ЗША Дональд Трамп у нядзелю зрабіў апошняе папярэджанне ХАМАС, заклікаўшы палесцінскую групоўку прыняць амерыканскія ўмовы па мірным пагадненні ў Газе, піша Бі-бі-сі.
Фота: Chip Somodevilla / Getty Images
«Усе хочуць, каб закладнікі вярнуліся дадому. Усе хочуць, каб гэтая вайна скончылася! Ізраільцяне прынялі мае ўмовы. Пара і ХАМАС іх прыняць. Я папярэджваў ХАМАС пра наступствы адмовы. Гэта маё апошняе папярэджанне, іншага не будзе!», — напісаў Трамп у сваёй сацсетцы Truth Social.
Гэта ўжо не першае апошняе папярэджанне Трампа, з якім ён звяртаецца да ХАМАС. У сакавіку прэзідэнт ЗША патрабаваў ад групоўкі неадкладна вызваліць усіх закладнікаў, якіх утрымліваюць у сектары Газа, а таксама пакінуць тэрыторыю анклава.
«Гэта ваша апошняе папярэджанне! Што датычыцца кіраўніцтва [ХАМАС], цяпер самы час пакінуць Газу, пакуль у вас яшчэ ёсць шанец. Таксама звяртаюся да жыхароў Газы: вас чакае цудоўная будучыня, але не ў тым выпадку, калі вы будзеце ўтрымліваць закладнікаў. Калі вы гэта зробіце — вы памрэце», — папярэджваў Трамп паўгода таму.