Келаг пра атаку на Кіеў: Гэта не сігнал, што Расія хоча дыпламатычным шляхам скончыць вайну
Падчас абстрэлу Кіева Расіяй быў пашкоджаны будынак ураду Украіны.
Полымя ва ўрадавым будынку 7 верасня. Фота: ДСНС
Спецпрадстаўнік прэзідэнта ЗША Кіт Келаг асудзіў атаку Расіі на Кіеў.
«Небяспека любой вайны заключаецца ў эскалацыі. Расія, падобна, нарошчвае сваю моц, і найбуйнейшы за ўсю вайну напад быў здзейснены на будынак Кабінета міністраў Украіны ў Кіеве. Я быў з іх прэм'ер-міністрам Свірыдзенка два тыдні таму ў гэтым будынку. Гісторыя паказвае, што падзеі могуць выйсці з-пад кантролю ў выніку падобных дзеянняў. Менавіта таму прэзідэнт Трамп імкнецца спыніць гэтую вайну. Напад не быў сігналам, што Расія хоча дыпламатычным шляхам пакласці канец гэтай вайне», — напісаў Келаг у X.
Прэм'ер-міністр Украіны Юлія Свірыдзенка раней апублікавала відэа з пашкоджанага пасля расійскага абстрэлу будынка ўраду Украіны.
Прэм'ер Украіны Юлія Свірыдзенка ў будынку ўраду Украіны пасля абстрэлу. Фота: фэйсбук Свірыдзенка
У ноч на 7 верасня Расія выпусціла па Украіне 823 дроны і 13 ракет. Гэта рэкордная колькасць падчас адной атакі.