Большасць загінулых пры крушэнні фунікулёра ў Лісабоне — іншаземцы
У Лісабоне 3 верасня адбылася цяжкая трагедыя — крушэнне турыстычнага фунікулёра Glória. Усяго пры гэтым загінулі 16 чалавек, прычым 11 з іх былі іншаземцамі, паведамляе Euronews са спасылкай на партугальскую паліцыю.
Месца аварыі пасля таго, як зламаную кабіну фунікулёра прыбралі, завяршыўшы следчыя дзеянні. Лісабон, 5 верасня 2025 г. Фота: AP
Сярод ахвяр — грамадзяне Вялікабрытаніі, Канады, Паўднёвай Карэі, ЗША, Францыі, Швейцарыі, Украіны і Партугаліі. Яшчэ 21 пасажыр атрымаў траўмы.
Спачатку паліцыя паведамляла таксама пра смерць грамадзяніна Германіі, але пазней яго знайшлі жывым у бальніцы.
Катастрофа адбылася ўвечары 3 верасня, калі кабіна, запоўненая мясцовымі жыхарамі і турыстамі, сышла з рэек і ўрэзалася ў дом на крутым павароце. Дакладныя прычыны трагедыі пакуль не названыя, але вядома, што фунікулёр быў у добрым тэхнічным стане і праходзіў рэгулярныя агляды. Апошняя праверка адбылася за дзевяць гадзін да трагедыі.
Дзяржаўныя і гарадскія ўлады, а таксама транспартная кампанія Carris распачалі ўласныя расследаванні. На гэты час спынілі працу яшчэ тры фунікулёры Лісабона.
Падчас трагедыі загінулі і мясцовыя жыхары, у тым ліку супрацоўнікі дабрачыннай арганізацыі і член прафсаюза транспартнікаў. У краіне абвешчаны нацыянальны дзень жалобы, прэм’ер-міністр Луіш Мантэнегру назваў падзею «адной з найбуйнейшых трагедый у новай гісторыі Партугаліі».
На месцы катастрофы лісабонцы і турысты пакідаюць кветкі і пасланні. Многія замежныя госці, якія і самі збіраліся праехаць на гэтым фунікулёры, прызнаюцца, што вельмі ўражаныя і засмучаныя тым, што здарылася.
Чытайце таксама:
У Партугаліі абвешчана жалоба па загінулых у крушэнні фунікулёра ў Лісабоне