На «Гродна Азот» спынілі цэх
Жыхароў Гродна папярэдзілі пра спыненне цэха аміяк-3 на «Гродна Азот», піша Tochka.by.
Фота: azot.by
Гэта адбылося 3 верасня каля 13:35 з-за спынення падачы паветра на стадыю рыформінгу цэха. Як запэўнілі прадстаўнікі прамысловага гіганта, падстаў і прычыны для непакою ў жыхароў горада няма.
«Усе сістэмы, адказныя за спыненне цэха, адпрацавалі ў штатным рэжыме», — гаворыцца ў паведамленні.
Пуск цэха аміяк-3 правядуць цягам сутак. На раніцу 4 верасня ніякіх паведамленняў пра паспяховае аднаўленне працы не паступала. Калі мерапрыемствы прыпадуць на начны час, будзе бачна полымя факельнай устаноўкі.
Раней, 29 жніўня, у кацельным цэху філіяла «Завод Хімвалакно» пры распальванні гарэлкі паравога катла адбылася аварыя. Траўмы атрымалі два работнікі, якіх даставілі ў медустанову.
Прадпрыемства працягнула працу ў штатным рэжыме, тэхналагічныя працэсы не былі парушаныя. Пагрозы гораду і яго жыхарам не ўзнікала.