У адным з беларускіх універсітэтаў запусцілі лабараторыю лічбавых двайнікоў
У Полацкім дзяржаўным універсітэце імя Ефрасінні Полацкай адкрылі першую ў краіне айчынную адукацыйную лабараторыю лічбавых двайнікоў, распавялі ў прэс‑службе Міністэрства адукацыі.
У прэс‑службе падкрэслілі, што праект «Лічбавы двайнік» — першая ў краіне вучэбная прастора, цалкам пабудаваная на айчынных лічбавых тэхналогіях. Яны аналагічныя тым, што прымяняюцца на рэальных аб'ектах газавай галіны.
Ідэя стварыць лабараторыю з’явілася ў красавіку гэтага года на рабочай сустрэчы ў Гомельскім дзяржаўным тэхнічным універсітэце імя Сухога з удзелам кіраўнікоў профільных міністэрстваў, рэктараў вядучых ВНУ краіны і прадстаўнікоў прамысловых прадпрыемстваў у сферы энергетыкі.
Стварэнне такіх лічбавых двайнікоў было прадугледжана і канцэпцыяй інжынернай адукацыі да 2035 года, якую зацвердзілі ў маі ў Беларусі.
Новая лабараторыя ўяўляе сабой шматфункцыянальны лічбавы комплекс, які ўключае пяць ключавых зон:
- Лічбавы двайнік газаразмеркавальнай сістэмы Беларусі. Гэта дакладная віртуальная мадэль інфраструктуры, што дазваляе фарміраваць працэсы ў рэальным часе;
- Мабільны лічбавы памочнік. Гэта інтэлектуальная сістэма падтрымкі вучэбнага працэсу;
- Інтэрактыўная зона «Прывітанне, Алена». Платформа для дыялогу з лічбавым памочнікам, створаным на базе айчынных рашэнняў;
- Трэнажорна-сімуляцыйны клас. Тут імітуюцца штатныя і аварыйныя сітуацыі для адпрацоўкі кіраўнічых рашэнняў;
- 3D‑кластар. Прастора для візуалізацыі і аналізу вялікіх аб'ёмаў даных.
Асаблівасць лабараторыі — у выкарыстанні беларускага праграмна‑абсталяванага комплексу. Гэта, як адзначылі ў ведамстве, дае студэнтам доступ да актуальных тэхналагічных інструментаў і рэальных прамысловых дадзеных. Будучыя інжынеры вучацца на сцэнарах, максімальна набліжаных да працы на працуючым прадпрыемстве.