Беларуская АЭС вырабіла 50 млрд кВт·г электраэнергіі
З моманту ўключэння ў аб’яднаную энергасістэму першага энергаблока (3 лістапада 2020 года) Беларуская атамная станцыя (БелАЭС) сумарна вырабіла 50 млрд кВт·г электраэнергіі. Гэта дазволіла замясціць 13,6 млрд м³ прыроднага газу, паведамляе Мінэнерга.
Фота: Мінэнерга
Кожны з энергаблокаў вырабляе каля 28 млн кВт·г электраэнергіі за суткі. Доля атамнай генерацыі ў агульным аб’ёме вытворчасці электраэнергіі ў Беларусі складае 40 %.
Мінэнерга зазначае, што ўзвядзенне і ўвод у эксплуатацыю Беларускай АЭС стала важным этапам у развіцці энергасістэмы:
- краіна цалкам забяспечвае сябе ўласнай электраэнергіяй і адмовілася ад імпарту;
- масавая электрыфікацыя і пераход населеных пунктаў на электраацяпленне павышаюць камфорт пражывання мільёнаў людзей;
- у беларускіх гарадах расце колькасць электратранспарту;
- за кошт праводзімай мадэрнізацыі электрасетак забяспечваецца надзейнасць электразабеспячэння.