Бацька забіў сына-геймера падчас сваркі з-за гульні ў «Танкі», і яму амаль нічога за гэта не было
Суд палічыў гэта перавышэннем самаабароны.
Як піша «База», адной майскай ноччу 29-гадовы Іван (імя зменена) з Пышмінскага раёна Свярдлоўскай вобласці гучна і з лаянкай гуляў у «Танкі». Бацька і маці не маглі заснуць праз крыкі. Тады бацька зайшоў да сына і зрабіў яму заўвагу.
У адказ хлопец накінуўся на бацьку з кулакамі, збіў яго і пачаў пагражаць забойствам. Маці, якая выйшла на шум і паспрабавала ўрэгуляваць сітуацыю, таксама пацярпела. Сын, паводле выдання, і раней біў іх пасля крыўдных пройгрышаў.
Пасля перапалкі бацька пайшоў на кухню. У гэты момант сын, відаць, канчаткова выйшаў з сябе і ўзяў нож. Як распавёў абвінавачаны, убачыўшы ў люстэрку сына са зброяй у руках, ён схапіў са стала нож і нанёс два апераджальныя ўдары — у грудзі і ў галаву. Раненні аказаліся смяротнымі.
Супраць бацькі ўзбудзілі крымінальную справу аб забойстве. Суд прызнаў, што мужчына дзейнічаў зыходзячы з самаабароны, хоць і перавысіў яе межы.
Яго прысудзілі да 1 года і 2 месяцаў абмежавання волі — яму забаронена выязджаць за межы свайго раёна і змяняць месца жыхарства без дазволу.