ЗША прададуць Украіне 3350 дальнабойных ракет ERAM

ЗША ўхвалілі продаж Украіне 3350 далёкастрэльных ракет ERAM (Extended Range Attack Munition), якія могуць біць на адлегласць ад 250 да 450 кіламетраў. Гэта значыць, яны патэнцыйна могуць трапіць нават у раён гарадоў Калуга, Тула і Ліпецк. Украінская армія можа атрымаць іх ужо ў найбліжэйшыя месяцы, а аплацяць закупку еўрапейскія краіны, піша Reuters.

Фота: Army Recognition

ERAM — гэта авіяцыйная крылатая ракета класа «паветра—паверхня», прызначаная для паражэння наземных і марскіх цэляў. Яе радыус дзеяння складае ад 240 да 450 км, а модульная канструкцыя дазваляе адаптаваць зброю пад розныя задачы.

Кошт куплі складае 825 мільёнаў даляраў і будзе пакрыты за кошт фінансавання з Даніі, Нарвегіі і Нідэрландаў. Раней гэтыя краіны разам з Германіяй выдзелілі 1,5 мільярда даляраў на набыццё амерыканскай зброі для Украіны. Дадатковае фінансаванне можа адбывацца праз праграму фінансавання замежных ваенных аперацый ЗША.

Хоць адміністрацыя Дональда Трампа раней дазваляла пастаўкі зброі, якая ўжо была ў распараджэнні Украіны, гэта, як мяркуецца, будзе першы вялікі продаж новага ўзбраення.

Паводле слоў крыніц, ракеты могуць паступіць Украіне яшчэ ў гэтым годзе, магчыма, нават праз паўтара месяца.

Пакуль што ЗША, праўда, не дазваляюць Украіне выкарыстоўваць гэтыя ракеты для ўдараў на тэрыторыі Расіі, і пакуль невядома, ці будуць якія-небудзь абмежаванні адносна ERAM. Але нядаўна Дональд Трамп крытыкаваў ранейшую адміністрацыю Джо Байдэна за тое, што Украіне нібыта не дазваляюць адказваць на ракетныя ўдары агрэсара. Ён адзначыў, што без магчымасці адказваць цяжка перамагчы ў вайне, і дадаў, што наперадзе «цікавыя часы».

Каментары да артыкула