Як будуць выглядаць катэджы і таўнхаусы ў новым модным жылым квартале Мінска
«Мінскбуд» паказаў план жылога квартала «Утульны-2», які будзе складацца з катэджаў і таўнхаусаў. Гэты комплекс будуецца ў межах вуліц Парніковая — Падлесная — Анаева.
Тут акрамя аднакватэрных і зблакаваных дамоў будзе гандлёва-адміністрацыйны будынак, паркоўкі, дзіцячыя пляцоўкі, спартзоны, пляцоўкі для заняткаў міні-футболам, валейболам і тэнісам.
«Мінскбуд» прадставіў таксама планы паверхаў пяці катэджаў рознага тыпу і таўнхауса з варыянтамі расстаноўкі мэблі.
У комплексе будзе каля 100 дамоў і 60 кватэр у таўнхаусах.
Адзін шматпавярховік тут ужо здадзены ў эксплуатацыю, другі будуецца.
Нядаўна гендырэктар «Мінскбуда» Аляксандр Церахаў казаў, што катэджы плануюць прадаваць праз аўкцыёны, а таўнхаусы — па прынцыпе долевага будаўніцтва. Мяркуецца, што ў 2026 годзе гэтую пляцоўку цалкам забудуюць.