Імпарт казахскай фанеры ў Польшчы ўпаў на 95%. Насамрэч яна была беларускай і расійскай

Імпарт «казахскай» фанеры ў Польшчу амаль цалкам абваліўся — у першай палове 2025 года ён упаў на 95% у параўнанні з аналагічным перыядам мінулага года. Гэта вынік дзеянняў Нацыянальнай падатковай адміністрацыі, якая фактычна абмежавала абыход санкцый у дачыненні да расійскай і беларускай драўніны, паведамляе Беларуская рэдакцыя Польскага радыё.

Фота: freepik.com

Як адзначае выданне Dziennik Gazeta Prawna, бярозавая фанера расійскага і беларускага паходжання падпадае пад дзеянне эмбарга з ліпеня 2022 года.

Нягледзячы на ​​гэта, яна доўгі час пасля таго працягвала пастаўляцца ў Польшчу ў якасці прадукцыі з Казахстана, хоць гэта стэпавая краіна, дзе амаль няма лясоў, і раней Польшча адтуль фанеру не імпартавала.

Паводле газеты, меры, прынятыя Польшчай для абмежавання імпарту фанеры расійскага і беларускага паходжання, даюць вынікі. Тэма з'яўляецца актуальнай прынамсі з 2023 года, калі тое ж выданне паведаміла, што некалькі польскіх кампаній спецыялізаваліся на імпарце «казахскай» фанеры.

У 2024 годзе вынікі экспертызы нямецкай лабараторыі Agroisolab пацвердзілі, што бярозавая фанера, якая прадавалася ў Польшчы, верагодна, паходзіць з заходніх рэгіёнаў Расіі. 

У студзені 2025 года расследаванне Earthsight засведчыла, што сем з дзесяці найбуйнейшых расійскіх экспарцёраў бярозавай фанеры звязаныя з расійскімі алігархамі і ўсё яшчэ пастаўлялі яе ў краіны Еўрапейскага Саюза.

Паводле ацэнак арганізацыі, у Еўропу магла трапіць нелегальная расійская фанера на суму 1,5 мільярда еўра, з якіх 669 мільёнаў еўра прыпадае на Польшчу. Аднак, як адзначае Dziennik Gazeta Prawna, сітуацыя ў апошнія месяцы значна змянілася.

Каментары да артыкула