У Мінску з'явіўся адзіны ў СНД апарат са штучным інтэлектам для лячэння раку
Рэвалюцыйны метад лячэння пацыентаў анкагематалагічнага профілю — таматэрапію — выкарыстоўваюць спецыялісты Мінскага навукова-практычнага цэнтра хірургіі, транспланталогіі і гематалогіі. Аб гэтым «Мінск-Навінам» расказаў намеснік дырэктара па гематалогіі гэтай медустановы, кіраўнік Рэспубліканскага цэнтра гематалогіі і перасадкі касцявога мозга, доктар медыцынскіх навук, прафесар Анатоль Ус.
Паводле слоў спецыяліста, падчас рэканструкцыі аднаго з блокаў цэнтра там усталявалі сучасны лінейны паскаральнік — апарат таматэрапіі.
— Сёння гэта высокатэхналагічнае абсталяванне — адзінае на прасторах СНД, — кажа Ус. — Апарат новага пакалення з элементамі штучнага інтэлекту. Гэта дазваляе істотна павысіць эфектыўнасць лячэння пацыентаў, у тым ліку іх падрыхтоўку да трансплантацыі касцявога мозгу.
Прафесар адзначыў, што таматэрапія — гэта вельмі сучасны метад лячэння, сутнасць якога заключаецца ў прыцэльным апрамяненні ракавых клетак.
— Ёсць таргетныя лекавыя прэпараты, якія вельмі эфектыўныя ў анкалогіі, гематалогіі, — растлумачыў А. Ус. — У радыялогіі, дзе выкарыстоўваюцца прамянёвыя метады, аналагічна працуе машына таматэрапіі: «страляе», як з гарматы, выключна ў мэту — па пухлінных тканінах, не закранаючы пры гэтым здаровыя.
Таксама на гэтым апараце праводзіцца прамянёвая тэрапія пацыентам з пухлінамі печані, якія чакаюць трансплантацыю гэтага органа.
Інавацыйнае лячэнне даступна для дарослых і дзяцей Беларусі, а таксама для замежных пацыентаў. Пры гэтым для беларусаў таматэрапія праводзіцца бясплатна, як і перасадка касцявога мозга, печані, іншых органаў.