Былы гандбаліст Рутэнка расказаў, як катаецца па Еўропе нягледзячы на санкцыі
Былы славуты гандбаліст, а цяпер кіраўнік Беларускай тэніснай федэрацыі Сяргей Рутэнка даў інтэрв'ю газеце «Прессбол», у якім сярод іншага згадаў пра тое, што ўнесены Польшчай у санкцыйныя спісы, але гэта не замінае яму ездзіць па Еўропе.
Сяргей Рутэнка. Фота: «Прессбол»
Паводле слоў Рутэнкі, абыходзіць санкцыі яму дазваляе наяўнасць адразу двух пашпартоў грамадзяніна Еўрасаюза — славенскага і іспанскага:
«Палякі ж наклалі на мяне персанальныя санкцыі, і была смешная сітуацыя. Перасякаў мяжу з Літвой, памежнікі адрэагавалі даволі эмацыйна, а затым падышоў начальнік змены і сказаў: «Палякі — дзіўныя людзі. Навошта яны ўключылі вас у санкцыйны спіс? Бо мы не можам вас не прапусціць з еўрапейскімі пашпартамі». Так што я магу перасоўвацца, хоць гэта заўсёды звязана з пэўнымі пытаннямі».
Прычыны ж таго, чаму ён у свой час памяняў жыццё ў Еўропе на беларускае — прыхільнасць да «традыцыйных каштоўнасцяў». Хоць нават жонка яго спачатку ад гэтага кроку адгаворвала:
«Яна спачатку думала як дзяўчынка, спрабавала растлумачыць мне сваё меркаванне. Але я сказаў, што без варыянтаў.
Абгрунтаваў гэта не толькі сваёй цягай на радзіму, але і тым, што адбывалася, адбываецца і будзе адбывацца ў той жа Барселоне. Першыя званочкі мы бачылі, калі дачка пайшла ў садок у два гады, і там пачаліся размовы пра гендэрную роўнасць і ўсё астатняе. І ў плане бяспекі сітуацыя пагаршалася.
А цяпер, калі ездзім у Іспанію да сяброў або па нейкай неабходнасці, жонка кажа: дзякуй богу, што ты мяне не паслухаў і настаяў на вяртанні дадому. Нейкія рэчы мне былі ўжо тады зразумелыя, а паколькі жонка ўсё ж такі знаходзіцца «за мужам», мы вярнуліся ў Мінск. Гляджу назад, лічу, што зрабілі правільна».