Паміж Карлсанам і «Чорным люстэркам»: выходзіць новы беларускі дэтэктыў для дзяцей

У маленькім горадзе ля запаведніка жыве дзяўчынка, вакол якой раптам пачынаюць адбывацца дзіўныя рэчы. Новы беларускі дэтэктыў для дзяцей з такім сюжэтам прэзентуе выдавецтва Gutenberg Publisher. Замовіць навінку вы ўжо можаце па спасылцы (з прамакодам nashaniva — зніжка 10%). Журналістка Ганна Кручкова, аўтарка кнігі «Хто ты, дрон?», распавяла, як з'явілася аповесць. А таксама падзялілася ўласным досведам, як матывавала сына чытаць.

Вокладка выдання «Хто ты, дрон?» Ганны Кручковай

Гісторыі напісання кнігі «Хто ты, дрон?» можна было б прысвяціць асобнае выданне. Працу над сваім першым творам Ганна пачала даўно — яшчэ тады, калі яе 21-гадовы сын быў маленькім. Тады журналістка вырашыла ажыццявіць сваю дзіцячую мару і напісаць працяг прыгод улюблёнага кніжнага персанажа — Карлсана.

— Я напісала гісторыю пра тое, як хлопчык з Беларусі паехаў у Швецыю, каб адшукаць Карлсана і пасябраваць з ім. Знайшла выдавецтва — і мы выдалі электронную версію кнігі.

У другой частцы ўжо Карлсан прылятаў у Беларусь і шукаў скарбы.

— Але потым мне параілі звярнуцца да нашчадкаў Астрыд Ліндгрэн, бо ўсё ж такі аўтарскія правы — сур’ёзная рэч. І яны сказалі даволі відавочную рэч: Астрыд Ліндгрэн не хацела б, каб яе герояў выкарыстоўвалі іншыя людзі. Дазволілі карыстацца маёй кнігай, але выключна для хатняга чытання.

Таму тыя кнігі Ганны шырокі свет так і не пабачыў — хоць яны і засталіся на кніжнай паліцы яе сына. Міналі гады, але ідэя выдаць кнігу не адпускала. Так у цэнтры ўвагі замест Карлсана апынуўся дрон Андрон.

Ганна Кручкова, журналістка і аўтарка выдання «Хто ты, дрон?»

Ганна жартуе, што, каб зрабіць гісторыю больш цікавай для сучасных падлеткаў, яна натхнялася ў тым ліку серыялам «Чорнае люстэрка».

— Новая гісторыя атрымалася зусім іншая, але ж Карлсан натхніў. Працавала я над ёй у 2019—2020 гадах, але першапачаткова гэта была не кніжка, а сцэнар для фільма. Бо тады мне хацелася засвоіць сцэнарнае майстэрства, і я з дапамогай дасведчаных сцэнарыстаў рабіла гэтую спробу.

Да працы над тэкстам Ганна вярнулася ўжо пасля эміграцыі ў Польшчу. Менавіта тады з’явілася жаданне ператварыць сцэнар у беларускамоўны дзіцячы дэтэктыў з элементамі фантастыкі.

— Сюжэт такі: у жыцці дзяўчынкі, якая жыве ў маленькім горадзе ля запаведніка, пачалі адбывацца дзіўныя рэчы. Спачатку таемным чынам знік яе тата, а потым з’явіўся новы сябар — дрон. Разам яны пачынаюць расследаваць дэтэктыўную гісторыю…

Падзеі кнігі адбываюцца ў 2028 годзе ў абстрактным горадзе, але прататыпам яго можна назваць Браслаў. Пазнаць таксама можна возера Дрывяты.

Старонкі кнігі «Хто ты, дрон?»

Кажуць, што пісаць для падлеткаў больш складана, чым для дарослых. Але Ганна з гэтым не пагаджаецца.

— Я абрала форму дзённіка дзяўчынкі, дзе яна дзеліцца сваімі думкамі — і пісаць так мне было даволі лёгка. Даволі старанна працавала з мовай, бо мне хацелася, каб сказы былі вельмі глыбокімі, насычанымі.

Летась Ганна Кручкова з творам «Хто ты, дрон?» перамагла ў конкурсе рукапісаў на беларускай мове «Шуфлядка» ў намінацыі «Дзіцячая і падлеткавая кніга».

Старонкі кнігі «Хто ты, дрон?»

Як маці, яна разважае над тым, як заахвоціць сучасных школьнікаў чытаць і бачыць далей за ўласны гаджэт.

— Мне здаецца, чытаць — гэта звычка. Калі такую звычку дзіцяці прывіць з дзяцінства, яно будзе чытаць. Нельга параўнаць кнігу ды тыкток. Калі ты чытаеш кнігу, то трапляеш зусім у іншае вымярэнне. Не ўсе ж дзеці візуалы і могуць рэалізаваць свае патрэбы праз фільмы і гульні. Камусьці сапраўды падабаецца пагружацца ў свет літар — важна толькі навучыць гэтаму. Набываць прыгожыя друкаваныя кніжкі, чытаць разам, абмяркоўваць — праз гэта і з’яўляецца любоў для чытання.

Ганна кажа, што свайму сыну (цяпер яму ўжо 21 год) прапаноўвала таксама запісваць свае думкі, нешта прыдумляць.

— Звычайна ў нядзелю ён сядаў і пісаў свае дзіцячыя кніжкі. Мы іх нават выдавалі для яго, рабілі просценькія ілюстрацыі. Спадзяюся, перададзім нашчадкам такую сямейную бібліятэку.

Кнігу ўжо можна набыць праз сайт выдавецтва. З прамакодам nashaniva — зніжка 10%. Аповесць будзе цікавая дзецям 9-12 гадоў, якія любяць прыгоды і цікавяцца тэхналогіямі.

Каментары да артыкула