Пробны перапіс насельніцтва пройдзе ў 2027 годзе
Плануюць таксама абнавіць закон аб перапісе насельніцтва.
Фота: Getty Images
Чарговы перапіс насельніцтва будзе ў 2029 годзе. Але перад гэтым правядуць тэставы — у 2027-м.
Падчас мінулага перапісу 22% грамадзян запаўнялі анкеты праз інтэрнэт.
У наступным перапісе хочуць больш выкарыстоўваць адміністрацыйныя крыніцы інфармацыі, паведаміла «СБ» старшыня Нацыянальнага статыстычнага камітэта Іна Мядзведзева.
«Ужо аналізуюцца ўсе базы даных, інфармацыйныя рэсурсы дзяржорганаў і арганізацый, якія б дазволілі нам выкарыстоўваць інфармацыю ў перадзапаўненні перапіснога ліста.
Перад пачаткам перапісу пераглядаецца заканадаўства, якое рэгламентуе яго правядзенне. Запланавана абнаўленне Закона «Аб перапісе насельніцтва».
Да выхаду на пробны перапіс у 2027 годзе хочам атрымаць пілотнае праграмнае забеспячэнне на планшэты, каб у далейшым апрабаваць яго падчас перапісу. У нас ёсць задумкі па выкарыстанні штучнага інтэлекту», — падзялілася Мядзведзева.