Падчас масіраванага ўдару па Украіне расійская ракета трапіла па амерыканскай кампаніі
Прадпрыемства ў Закарпацкай вобласці займаецца вытворчасцю электронікі, паведаміў Міністр замежных спраў Украіны Андрэй Сібіга.
Наступствы расійскага ўдару. Фота: andrii_sybiha / X
Сібіга сказаў, што расійская ракета патрапіла ў амерыканскае прадпрыемства па вытворчасці электронікі ў Закарпацкай вобласці. Па яго словах, гэта прывяло да сур'ёзных пашкоджанняў і ахвяр. Назву аб'екта ён не раскрыў.
«Цалкам грамадзянскі аб'ект, які не мае нічога супольнага з абаронай або вайскоўцамі. Ніякай вайсковай логікі ці неабходнасці, толькі тэрор супраць людзей, бізнесу і нармальнага жыцця ў нашай краіне», — напісаў ён у сацсетках.
Гэта адбылося падчас чарговай масіраванай атакі Расіі на Украіну ноччу 21 жніўня. У прыватнасці, сілы РФ ударылі па тэрыторыі аднаго з прадпрыемстваў Мукачава, вядома пра 12 пацярпелых.
Міністр адзначыў, што гэта не першая атака Расіі па амерыканскім прадпрыемстве ва Украіне — былі таксама ўдары па офісах Boeing у Кіеве ў пачатку гэтага года і іншыя.