Качанава: З задавальненнем пачытала Захара Прылепіна. А з любімага — Пушкін, Талстой і праваслаўная літаратура
З нерасійскіх аўтараў Качанава згадала толькі Рэмарка.
Наталля Качанава
Старшыня Савета Рэспублікі Наталля Качанава расказала ў інтэрв'ю газеце «Знамя юности», якія кнігі чытае.
«Перыядычна вяртаюся да класікі, часам чытаю лёгкую літаратуру (каб разгрузіцца), сачу за сучаснымі бестселерамі, люблю гістарычныя раманы і аўтабіяграфіі. Праўда, вельмі выбарачна: у сутках, на жаль, усяго 24 гадзіны.
У маёй старэйшай дачкі ёсць асабістая вялікая сямейная бібліятэка, якую яна пастаянна папаўняе, у тым ліку рэдкімі выданнямі. У асноўным я бяру кнігі ў яе. Па рэкамендацыі дачкі нядаўна з задавальненнем прачытала два творы Захара Прылепіна — «Абіцель» i «Ясенін. Абяцаючы сустрэчы наперадзе». Мой тата вельмі любіць гэтага паэта-сярэбраніка, восенню будзе 130 гадоў з дня яго нараджэння. Часам кнігі дораць калегі і сябры, нешта бяру пачытаць у грамадскай бібліятэцы.
З улюбёнага — Пушкін. «Яўгенія Анегіна» ведала практычна на памяць. Непаўторная анегінская страфа. І калі зноў перачытваю раман у вершах, лаўлю сябе на думцы, што чытаю не радкі, а перагортваю па памяці старонкі. Яшчэ з улюбёных — Талстой і Эрых Марыя Рэмарк, яго «Тры таварышы» і многія іншыя творы.
Неабыякавая да праваслаўнай літаратуры. Яна наогул займае асаблівае месца ў маёй душы. З апошніх — успаміны Голубевай-Карэлiнай, духоўнай дачкі Серафіма Вырыцкага. Спадабалася дакументальнае даследаванне Паўла Басінскага «Леў Талстой. Уцёкі з рая», дзе ён апавядае аб апошніх гадах жыцця вядомага пісьменніка, яго ўцёках з дому і смерці, ахутанай мноствам міфаў і легенд.
Зараз пагрузілася ў аўтабiяграфiчную кнігу «Мой тэатр» пра Мікалая Цыскарыдзе. Люблю балет, хаджу з задавальненнем на пастаноўкі. Нядаўна ў Мінску піцерская трупа тэатра балета Барыса Эйфмана падарыла неверагоднае задавальненне прыхільнікам «Ганны Карэнінай», расказаўшы новую старую гісторыю».