Праз змену клімату папуляцыі птушак у тропіках скараціліся на 38%
Навукоўцы высветлілі, што экстрэмальная спёка, выкліканая змянамі клімату, стала галоўнай прычынай скарачэння колькасці птушак у тропіках. Паводле даследавання, апублікаванага ў часопісе Nature Ecology & Evolution, з 1950 па 2020 год папуляцыі ў гэтым рэгіёне маглі зменшыцца на 25—38% у параўнанні з ранейшай сітуацыяй.
Жоўтагорлы тукан. Фота ілюстрацыйнае
Аналіз больш чым 3000 папуляцый птушак засведчыў, што дні з анамальна высокай тэмпературай тармозяць іх рост з-за гібелі ад перагрэву і абязводжвання, а таксама з-за няўдалага размнажэння пад стрэсам. Асабліва ўразлівыя трапічныя віды, бо яны прыстасаваныя да вузкага тэмпературнага дыяпазону і кепска пераносяць рэзкія змены.
У тропіках шкода ад спёкі аказалася нават большай, чым ад прамога ўздзеяння чалавека на прыроду, напрыклад, высякання лясоў. І гэтым тлумачыцца, чаму колькасць птушак змяншаецца нават у некранутых лясах Паўднёвай і Цэнтральнай Амерыкі.
Вынікі даследавання ставяць пад сумнеў меркаванне, што для захавання відаў дастаткова толькі абараняць іх асяроддзе пражывання. Барацьба з глабальным пацяпленнем аказваецца для захавання біяразнастайнасці не менш важнай.
Чытайце таксама:
Грыбнік пайшоў у лісічкі і сустрэў «птушку-дыназаўра»
Барацьба за птушку: у краме ў Заслаўі жыве канарэйка. Гэта падабаецца не ўсім