Беларуская праваслаўная царква вярнула ў назву «Маскоўскі патрыярхат» пасля заўвагі з Масквы
Сінод РПЦ публічна адчытаў кіраўніцтва Беларускай праваслаўнай царквы. Там адразу «выправіліся».
Кіраўнік БПЦ мітрапаліт Веніямін
Беларуская праваслаўная царква дадала ў сваю назву прыналежнасць да Маскоўскага патрыярхату.
На афіцыйным сайце БПЦ змянілі лагатып. Калі раней там было напісана «Беларуская праваслаўная царква», то цяпер назва стала даўжэйшай — «Беларускі экзархат Маскоўскага патрыярхату», заўважыла «Хрысціянская візія».
Пры гэтым «Беларуская праваслаўная царква» цяпер напісана ў дужках, як дадатак.
Скрыншот «Хрысціянскай візіі»
БПЦ змяніла лагатып пасля заўвагі з Масквы. За апошнія дзесяцігоддзі ў Беларусі склаўся кансэнсус наконт назвы сваёй царквы як «Беларуская праваслаўная царква» без грувасткага азначэння «Маскоўскага патрыярхату». Але Сінод РПЦ гэта раздражняе.
У адным з ліпеньскіх пастаноў Сінод нагадаў кіраўніцтву БПЦ, што ўсе назвы павінны змяшчаць фармулёўкі «Рускай праваслаўнай царквы» або «Маскоўскага патрыярхату». У Мінску амаль адразу паслухаліся.