У Расіі забаранілі продаж кітайскіх канкурэнтаў МАЗа і КамАЗа
Расстандарт паведаміў пра забарону выпуску на аўтарынку РФ кітайскіх грузавікоў Dongfeng, Foton, Faw і Sitrak, паведамляюць расійскія СМІ.
Прычына — выяўленне парушэнняў, якія небяспечныя для здароўя і жыцця кіроўцаў і іншых удзельнікаў дарожнага руху, у тым ліку пешаходаў. Ідзе гаворка пра дрэнныя тармазы, неадпаведны ўзровень гуку і мноства іншых праблем, выяўленых падчас праверкі.
Акрамя таго, знайшліся неадпаведнасці ў дакументах, што пацвярджаюць устойлівасць:
- — грузавікоў да электрамагнітнага выпраменьвання;
- — месцаў мацавання рамянёў бяспекі;
- — сядзенняў, іх мацаванняў і падгалоўнікаў;
- — абароны ад угону;
- — задніх і бакавых ахоўных прылад;
- — рулявога кіравання;
- — пярэдніх супрацьпадкатных прылад.
З узроўнем утрымання шкодных рэчываў у кабіне таксама не ўсё гладка.
Вынік — імпарт і рэалізацыя ў Расіі кітайскіх грузавікоў Dongfeng, Foton, Faw, Sitrak забаронены.