Францыя цалкам вывела свае войскі з Сенегала
Пасля больш як 60 гадоў прысутнасці французская армія пакінула Сенегал. Гэта стала вынікам рашэння новага прэзідэнта краіны Басіру Дыямая Фая, які падкрэсліў, што Сенегал — незалежная і сувярэнная дзяржава, і замежныя вайсковыя базы на яе тэрыторыі непрымальныя, паведамляе Euronews.
Падчас урачыстай цырымоніі. Фота: Cem Ozdel/Anadolu via Getty Images
17 ліпеня 2025 года, Францыя афіцыйна перадала Сенегалу апошнія два свае аб’екты — вайсковы лагер Жэй і авіяцыйны пункт у аэрапорце Дакара.
Цяпер пастаянная французская вайсковая прысутнасць у Сенегале скончаная, хоць Парыж застаецца адкрытым да супрацоўніцтва з Дакарам у іншых сферах.
Гэты крок стаў часткай шырэйшага працэсу вываду французскіх войскаў з Афрыкі, які пачаўся яшчэ раней: у апошнія гады Францыя ўжо пакінула Малі, Чад, Буркіна-Фасо і Нігер.
Як правіла, сыход з рэгіёну Францыі выкарыстоўваецца Расіяй, якая пры падтрымцы афрыканскіх падраздзяленняў ПВК «Вагнер» спрыяе прыходу ў гэтых краінах да ўлады праз вайсковыя перавароты сваіх палітычных саюзнікаў.
У Афрыцы Францыя яшчэ мае базу ў Джыбуці, дзе знаходзіцца каля 1500 вайскоўцаў.
Чытайце таксама:
Францыя пачала выводзіць свае войскі з Сенегала. Яе ўплывы ў Афрыцы ўсё меншаюць
Што рухае пераваротамі ў Заходняй Афрыцы?
Зрынуты прэзідэнт Нігера: Увесь рэгіён можа падпасці пад уплыў Расіі і ПВК «Вагнер»