Напярэдадні вялікіх выхадных стаў кепска працаваць сайт Беларускай чыгункі
У апошнія дні значна ўскладнілася купля квіткоў на сайце Беларускай чыгункі. Пра гэта сведчаць паведамленні грамадзян і абмеркаванні ў чатах, заўважыў «Позірк».
Мінскі чыгуначны вакзал. Фота ілюстрацыйнае
Для праверкі наяўнасці квіткоў у Расію пасажырам даводзілася карыстацца сайтам Расійскіх чыгунак.
З-за праблем на сайце ўзросла нагрузка на білетныя кассы, асабліва перад доўгімі выхаднымі (3—6 ліпеня).
У адным з чатаў беларусы папярэджваюць, што калі вы плануеце набываць квіткі ў касах на міжнародныя ці міжгароднія рэйсы, лепш ад гэтага адмовіцца — там вялікія чэргі, трэба стаяць у некалькіх чэргах адначасова.
Беларуская чыгунка пацвердзіла праблему раніцай 2 ліпеня і апублікавала абвестку на сваім сайце, дзе паведаміла, што з-за тэхнічных непаладак перыядычна недаступна атрымліваць расклад руху цягнікоў.
Там прыносяць прабачэнні за часовыя нязручнасці і раяць звяртацца ў касы для куплі і вяртання квіткоў або карыстацца тэрміналамі самаабслугоўвання для паездак з непазначанымі месцамі.
Чытайце таксама:
На ліпеньскія вялікія выходныя дададуць некалькі цягнікоў
У ліпені будуць істотныя змены ў маршрутах некаторых цягнікоў