Рада Еўропы вырашыла стварыць спецтрыбунал па агрэсіі Расіі супраць Украіны
Рада Еўропы заключыла пагадненне з Украінай аб стварэнні спецыяльнага трыбунала па злачынстве агрэсіі Расіі супраць Украіны, піша Бі-бі-сі.
Фота: AP
ААН лічыць такім злачынствам ужыванне ўзброенай сілы дзяржавай супраць суверэнітэту, тэрытарыяльнай цэласнасці або палітычнай незалежнасці іншай краіны.
Дакумент падпісалі ў Страсбургу генеральны сакратар Рады Еўропы Ален Берсе і прэзідэнт Украіны Уладзімір Зяленскі, які прыбыў у Францыю пасля ўдзелу ў саміце НАТА ў Гаазе.
«Кожны ваенны злачынец павінен ведаць, што ёсць правасуддзе, і гэта тычыцца Расіі, — сказаў Зяленскі пасля падпісання. — Правасуддзе патрабуе часу, але я ўпэўнены, што яно павінна адбыцца». «Мы павінны выразна паказаць, што агрэсія вядзе да пакарання», — дадаў ён.
Спецтрыбунал павінен судзіць найвышэйшых палітычных і ваенных кіраўнікоў, якія нясуць адказнасць за паўнамаштабнае ўварванне Расіі ва Украіну.
Аднак пачаць суд над прэзідэнтам Уладзімірам Пуціным, прэм’ер-міністрам Міхаілам Мішусціным і кіраўніком МЗС Расіі Сяргеем Лаўровым трыбунал зможа толькі пасля таго, як яны пакінуць свае пасады.