За палову чэрвеня мігранты спрабавалі перасячы мяжу з ЕС больш, чым за ўвесь першы квартал

За першую палову чэрвеня 2025 года Літва, Латвія і Польшча спынілі больш спробаў нелегальнага перасячэння мяжы з боку Беларусі, чым за ўвесь першы квартал года, піша «Радыё Свабода».

На польска-беларускай мяжы. Фота: Straż Graniczna

Усяго за 17 дзён чэрвеня было зафіксавана больш за 4 тысячы такіх выпадкаў:

• Літва — 67;
• Латвія — 998;
• Польшча — 3095.

Для параўнання, у студзені—сакавіку разам гэты паказнік склаў 4068:

• Студзень — 431;
• Люты — 686;
• Сакавік — 2951.

Асабліва вырасла колькасць такіх спробаў у Польшчы — яна ўжо пераўзышла сакавіцкі ўзровень на 13%. У Латвіі чэрвеньскія лічбы ў тры разы перавысілі паказчыкі першага квартала. А ў Літве, хоць і менш рэзкі рост, але ў 4 разы большы, чым у студзені.

Сітуацыя на межах Беларусі з краінамі Еўрасаюза застаецца напружанай. Міграцыйны крызіс працягваецца з 2021 года, і ўлады краін ЕС лічаць яго часткай гібрыднай атакі з боку Беларусі і Расіі. Самі беларускія ўлады ўсё адмаўляюць і вінавацяць ЕС у дрэнным стаўленні да мігрантаў. Але еўрапейскія службы неаднаразова фіксавалі, як беларускія памежнікі дапамагаюць мігрантам парушаць мяжу.

Каментары да артыкула