«Адзін раз за сто гадоў праехаў на транспарце». Жыхару Магілёва ў аўтобусе далі рэшту расійскімі манетамі
Мужчына замест трох беларускіх рублёў атрымаў тры расійскія. І паехаў разбірацца.
Жыхар Магілёва паскардзіўся, што кандуктар у аўтобусе даў яму рэшту расійскімі манетамі замест беларускіх.
Мужчына апублікаваў свой расказ у тыктоку. Паводле яго слоў, ён «адзін раз за сто гадоў» пракаціўся на аўтобусе і адразу трапіў у непрыемную сітуацыю. Замест трох манет па аднаму беларускаму рублю кандуктар дала яму рэшту тры расійскія рублі.
На наступны дзень мужчына паехаў разбірацца ў аўтапарк. Паводле яго слоў, на той момант начальства ўжо паглядзела відэа і нават знайшло вінаватага кандуктара. Мужчына вярнуў аўтапарку тры расійскія рублі і атрымаў назад тры беларускія.
Ён кажа, што папрасіў начальнікаў не караць кандуктара і не пазбаўляць яго прэміі, а проста папрасіць работнікаў уважліва глядзець, якія манеты яны прымаюць і аддаюць пасажырам.
У каментарыях далёка не ўсе гледачы падтрымалі мужчыну. Многія пісалі, што ён падняў занадта шмат шуму з-за трох рублёў. Але мужчына лічыць, што ўсё зрабіў правільна.
Ён змадэляваў адразу некалькі гісторый з дрэнным канцом, якія маглі б здарыцца з-за трох рублёў.
«Як вам такое. Калі грошай у абрэз, засталося толькі на білет на дызель да райцэнтра, 29 кіламетраў. І, адпаведна, з-за таго, што гэтыя тры рублі — не тры рублі, іх не хапіла», — прапанаваў адзін з варыянтаў аўтар відэа.